Luca Curci Architects-ն օգտագործում է աշխարհի ամենափխրուն նյութերից մեկը՝ կլիմայի փոփոխության մասին հայտարարություն անելու համար:
Իտալական ստուդիան, որը հիմնադրվել է 2006 թվականին՝ Լուկա Կուրչիի կողմից, ներկայացրել է նորարարական՝ ապակիների թանգարանի ծրագիրը, որը լողալու է ջրի վրա՝ օգնելով բարձրացնել շրջակա միջավայրի իրազեկությունն ամբողջ աշխարհում, գրում է Robb Report-ը:
«Ապակիների լողացող թանգարանը» ստեղծվել է ճարտարապետների եւ դիզայներների միջազգային թիմի կողմից՝ արհեստական ինտելեկտի աջակցությամբ: Ոգեշնչված Վենետիկում ապակու արտադրության հարուստ պատմությամբ՝ այս շենքը հմտորեն համատեղում է իտալական ավանդական արհեստագործությունը նորարարական տեխնոլոգիաների եւ ժամանակակից դիզայնի հետ: «Թանգարանը կլինի մի սրբավայր, որտեղ ապակու պատմությունը կհամապատասխանի ժամանակակից փորձերին»,-հայտնել են ընկերությունից:
Թիմը ուշադիր ուսումնասիրել է տարբեր նյութեր՝ թանգարանի կայունությունը ներսից եւ դրսից ապահովելու համար: Նրանք նաեւ ուսումնասիրել են շրջակա տարածքը, որպեսզի նվազագույնի հասցնեն շենքի ազդեցությունը օվկիանոսի շրջակա միջավայրի վրա:
Մոտ 3800 քառակուսի ոտնաչափ ինտերիերում կներկայացվեն արվեստի գործեր, որոնք կառաջացնեն մտորումներ եւ կբերեն նոր բացահայտումների:
Նախագիծը կներկայացվի կլիմայական փոփոխություններից տուժած մի քանի քաղաքներում, ինչպիսիք են Դուբայը, Նյու Յորքը, Հոնկոնգը, Սինգապուրը եւ Բուսանը:
Կլիմայի փոփոխությունն, իհարկե, ազդում է յուրաքանչյուր մայրցամաքի յուրաքանչյուր երկրի վրա: Եղանակային օրինաչափությունները փոխվում են, բնական աղետները դառնում են ավելի ծայրահեղ, իսկ ջերմոցային գազերի արտանետումները գտնվում են ամենաբարձր մակարդակի վրա: