Շավարշ Հակոբյանը նոր հավաքածու կներկայացնի GemGenève ոսկերչական միջազգային ցուցահանդեսում
19:23 12 ապրիլի, 2024Հայ ոսկերիչ Շավարշ Հակոբյանը նոր հավաքածու կներկայացնի GemGenève ոսկերչական միջազգային ցուցահանդեսում, որը կանցկացվի մայիսի 9-ին` Ժնեւում, գրում է Diamond World-ը։
Շավարշ Հակոբյանը Հայաստանի արվեստի պետական ակադեմիայի շրջանավարտ է։ Նախորդ ցուցահանդեսում իր դեբյուտի համար հայ նկարիչը ներկայացրել էր բացառիկ գործեր, որոնցում նյութերն ու ձեւերը մտնում են անսովոր բանաստեղծական երկխոսության մեջ։ Նրա ֆուտուրիստական ու շքեղ զարդերը գերել են հանդիսատեսին։ Այս անգամ երիտասարդ նկարիչը կվերադառնա բոլորովին նոր հավաքածուով։
GemGenève-ում նկարչի առաջին հայտնվելը միջազգային ճանաչում բերեց նրա ստեղծագործությանը եւ որոշիչ շրջադարձ եղավ նրա կարիերայում: Այս տարի վերադարձը նոր հորիզոններ կբացի նրա առաջ:
Հայ հանճարն իր համանուն ապրանքանիշը հիմնել է 2008 թվականին։ Փորձարկելով բազմազան եւ երբեմն անսովոր նյութեր, ինչպիսիք են փայտը, կաշին եւ գործվածքը:
Նրա գեղարվեստական պրակտիկան հիմնականում բնութագրվում է պինդ նյութերի օգտագործմամբ, որոնք արտահայտված են շարժումով։ Նրա մատանիները, բրոշները եւ կախազարդերը, որոնք ձգտում են «անմահացնել անցողիկ պահը», ունեն հարթ, ալիքավոր եւ կլանող կառուցվածքներ, որոնք զարմանալիորեն գեղեցիկ են:
Հակոբյանի ստեղծագործական գործընթացում ակնհայտ է այն համոզմունքը, որ ոչինչ չպետք է դոփի նույն տեղում։ Նրա պրակտիկայի հիմքում ընկած է ազատության մեծ զգացումը, որը ոգեշնչում է արտիստին ցանկացած նախագիծ հասցնել տրամաբանական ավարտի: Ոսկերչությանը մոտենալով որպես նոր բան հորինելու վարժություն՝ Շավարշ Հակոբյանը մոտ քսան տարի է, ինչ ստեղծում է գերժամանակակից զարդեր։