Burberry Prorsum-ը ցուցադրել է Բլումսբերիի գեղագիտությունը
19:17 18 փետրվարի, 2014Բլումսբերին Լոնդոնի ինտելեկտուալ կյանքի ավանդական կենտրոնն է, եւ Քեմդենի հարավային հատվածում տեղակայված հենց այս շրջանն է ներշնչանքի աղբյուր հանդիսացել բրիտանական ճանաչված ապրանքանիշի աշուն-ձմեռ 2014/15 սեզոնի կանացի նոր հավաքածուի ստեղծման համար:
Բեդֆորդ-սքվերի XVIII դարի Գեորգինյան շինությունը, կանաչապատ հրապարակներն ու զբոսայգիները կենդանացել են թագավորական Քենսինգթոն Գարդենսում, որտեղ ավանդաբար անցկացվում են Burberry Prorsum ապրանքանիշի ցուցադրությունները:
Հարուստ գունապնակը ցուցադրության հյուրերին տարել է մինչեւ խոր աշուն, որտեղ զաֆրանի եւ կեղտոտ դեղինի երանգները միախառնվում եւ վերածվում էին մուգ կապույտի եւ անտառային կանաչի:
Խոսելով կերպարների մասին՝ հարկավոր է ուշադրություն դարձնել ծնկից փոքր-ինչ ներքեւ կիսաթափանցիկ շրջազգեստներին, քաշմիրե պոնչոներին եւ վերարկուներին, բայց այս անգամ գրաֆիկական խոշոր նկարները կոտրել էին մինիմալիզն ու միօրինակությունը: Թխկենու տերեւները, աշնանային գույներն ու փայտի երանգների շքերթը Նորաձեւության տան տղամարդկանց հագուստի շարքն էին հիշեցնում, որը ցուցադրվել էր LondonCollections:Men 2014-ի շրջանակում:
Ներկայացված շարքում կարեւոր դեր էին խաղում նաեւ թեթեւ թաշկինակները: Դրանք վերածվում էին շարֆերի եւ երկար շալերի, որոնք բարակ գոտիով նրբագեղորեն հավաքվում էին իրանի շուրջ:
Ցուցադրության ավարտին մոդելները բեմում հայտնվել են անվան սկզբնատառերով զարդարված պոնչոներով:
Գրեգ Ադամս