«Շատ ուրախ եմ աղջկա համար, բայց կցանկանայի, որ առաջնեկս տղա լիներ». Մարինա Թագակչյան

Ինչպես արդեն տեղեկացրել ենք, հաղորդավարուհի Մարինա Թագակչյանը եւ նրա ամուսինը՝ կինոօպերատոր Ալեքսանդր Քալանթարյանը, սպասում են իրենց առաջնեկին։ NEWS.am STYLE-ն այդ առիթով զրուցել է Մարինայի հետ ու պարզել երեխայի սեռը, ինչպես նաեւ այլ մանրամասներ։

Մեզ հետ զրույցում, խոսելով հղիության ընթացքի մասին, Մարինան նշեց, որ ամեն ինչ նորմալ է ընթանում եւ ավելի շատ բերկրանք է զգում, քան ֆիզիկական ինչ-որ խնդիրներ։ «Փառք Աստծո, այդ փուլն անցել ենք»,- ասաց նա՝ հավելելով, որ ապագա մայրիկի զգացողությունները հեքիաթային են։

Մարինայի խոսքով՝ երեխան կծնվի հուլիսին։ «Նախնական ասել են աղջիկ, բայց, ամեն դեպքում, մինչեւ չծնվի, հաստատ չես կարող ասել, այդ պատճառով բալիկի շորիկները չեզոք գույների մեջ եմ գնել»,- նշեց նա՝ խոստովանելով, որ կցանկանար, որ իր առաջնեկը տղա լիներ։

«Առաջին բալիկի սեռը բացարձակ կարեւոր չէ, որովհետեւ ո’չ տղա ունեմ, ո’չ աղջիկ, երկուսին ել շատ ուրախ եմ, բայց ավելի շատ ամուսինս է ուրախ, որ աղջիկ է։ Դե, այդպես է, չէ՞, պապաներն ավելի շատ տղա են ուզում, բայց մեկ է, աղջիկներին ավելի շատ տեղ են տալիս, մամաներն էլ՝ հակառակը։ Ես շատ-շատ ուրախ եմ աղջկա համար, բայց ես ավելի շատ տղա երեխա սիրող եմ, եթե ինձ մնար, բնականաբար, կցանկանայի առաջինը տղա լիներ»,- ընդգծեց նա։

Խոսելով ապագա բալիկի անվան մասին՝ Մարինան նշեց, որ մի քանի տարբերակ ունեն, քանի որ 100 տոկոսով սեռը հայտնի չէ։

Հաղորդավարուհին հղիության ամբողջ ընթացքում ակտիվ աշխատում է եւ ծննդաբերելուց հետո էլ կշարունակի աշխատել, իհարկե, «այդ դժվար շրջանից ոտքի կանգնելուց հետո»։ «Սրանք իմ մտորումներն են, առաջ Աստված, ինչպես Աստված կամենա։ Ամեն դեպքում, ո’չ ես, ո’չ էլ իմ ընտանիքը միտք չունենք չաշխատելու, որովհետեւ երեխան չպետք է խոչընդոտ հանդիսանա։ Բացի այդ, տատիկները կան, կօգնեն։ Առաջին բալիկն իր ղսմաթն ունի, այնպես չի լինի, որ անխնամ կմնա»։

Զրուցեց՝ Շուշան Շատիկյանը