Անաստասիա Վոլոչկովան ընդդեմ Վալերիայի. «Իմ կարծիքով, այդ մարդկային պոռնկություն է»

Ինչպես արդեն տեղեկացրել էինք, ռուսական բալետի արտիստուհի Անաստասիա Վոլոչկովան համերգային ծրագրով այցելել էր Կիեւ, որտեղ ներկայացրել էր նաեւ իր նոր՝ «Буду с тобой» տեսահոլովակը:

Ըստ kp.ua-ի, Կիեւում գտնվելու ընթացքում Վոլոչկովան արտահայտվել է ռուսական շոու-բիզնեսի իր գործընկերների մասին: Արտիստուհին դատապարտել է Ուկրաինայի հարցում երգչուհի Վալերիայի եւ նրա ամուսին Իոսիֆ Պրիգոժինի պահվածքը: Պարուհին կարծում է, որ չի կարելի փոխել քաղաքական հայացքները միայն այն պատճառով, որ «քամին այն կողմ չի փչել»: Վերջերս Վալերիան սատարել էր Ղրիմի հարցում ՌԴ նախագահ Վլադիմիր Պուտինի քաղաքականությունը եւ հայտարարել, որ այլեւս չի գնալու Ուկրաինա:

«Ներեցեք, բայց, իմ կարծիքով, այդ մարդկային պոռնկություն է: Ես այդ չեմ ընդունում: Ու երբ նման մարդիկ սկսում են հայտարարել, ասենք՝ «ռուսաստանցիներ, եկեք չգնանք Ուկրաինա», ես տարակուսում եմ: Ինչպե՞ս կարելի է բաժանել ստեղծագործող մարդկանց, ովքեր միշտ միասին են եղել: Ուկրաինան միշտ հյուրընկալ է եղել Ռուսաստանից արտիստների հանդեպ: Իսկ հիմա այսպիսի խոսքեր լսել Վալերիայից եւ Իոսիֆ Պրիգոժինից… Չէ՞ որ այդ նրա անձնական կարծիքը չէ, այլ նրա ամուսնու եւ պրոդյուսերի: Ես պարզապես վրդովված եմ: Երբ պետք էր, նա գալիս ու մասնակցում էր բոլոր համերգներին, դրամ էր վաստակում…»,- նշել է Վոլոչկովան: