Սեդրակ Մամուլյանը եւ Սվետլանա Պողոսյանն՝ ազգային ավանդական խոհանոցի առանձնահատկության եւ ներկայիս խնդիրների մասին

Հայակական ավանդական խոհանոցի առանձնահատկության եւ ներկայիս խնդիրների մասին այսօր լրագրողների հետ հանդիպման ժամանակ խոսեցին Հայ խոհարարական ավանդույթների զարգացման և պահպանման հ/կ նախագահ Սեդրակ Մամուլյանը եւ Հայոց ազգագրության թանգարանի գիտական գծով փոխտնօրեն, ազգագրագետ Սվետլանա Պողոսյանը։

«Ազգային ուտեստը մեր ազգային դիմագիծն է։ Եվ պատահական չէ, որ ի թիվս այլ տարերի այսօր կարեւորվում է ազգային ուտեսը։ Ողջունելի է, որ վերջին շրջանում կազմակերպվում են միջոցառումներ, փառատոններ, որտեղ ներկայացվում է հայկական ավանդական խոհանոցը։ Մենք ունենք շատ համեղ ուտեստներ, որոնք ցավոք քչերը գիտեն։ Մեր խնդիրն է ազգային կերակրատեսակները ծանոթացնել ինչպես հայերին, այնպես էլ օտարերկրացիներին»,- ասաց Սվետլանա Պողոսյանը։

Ազգագրագետի խոսքով՝ շատ կարեւոր է, որ հայկական ավանդական կերակրատեսակները կոչեն հենց հայկական անվամբ․ «Շատ ուտեստներ ուենք, որոնք հայերն անվանում են թուրքերենով։ Օրինակ՝ «Ժենգյալով հաց»-ը։ Ժենգյալը թուրքական ծագում ունեցող բառ է, որը կոչվում է մոլախոտ։ Եթե մի օր նրանք ասեն, որ այդ կերակրատեսակը իրենցն է մենք չենք կարողանա հակառակն ապացուցել»։

Իսկ Սեդրակ Մամուլյանը նշեց․ «Եթե հայացք ենք գցում նախորդ տարիներին, ապա այսօր մարդկանց մոտ ազգային ուտեստների նկատմամբ հետաքրքրությունը մեծացել է։ Սակայն մի խնդիր կա, որ տուրիտական գործակալությունները, երբ տուրիստներին բերում են համտեսելու ազգային խոհանոցը նրանք չեն ներկայացնում, թե ինչ է կերակրատեսակ են նրանք ուտում, ինչու հենց այդ կերակրատեսակը կամ ինչ ծագում ունի այն»։

Իսկ վերջում Սեդրակ Մամուլյանը հավելեց, որ մեր ավանդական կերակրատեսակները բացի համեղ լինելուց ունեն նաեւ բուժիչ հատկություն։