Օգոստոսի 29-ին կկայանա հայկական առաջին սարսափ ֆիլմի պրեմիերան (ֆոտո)
15:01 26 օգոստոսի, 2014Օգոստոսի 29-ին «Մոսկվա» կինոթատրոնում կկայանա հայկական առաջին սարսափ` «Մեռյալ հովիտ» ֆիլմի պրեմիերան:
««Մեռյալ հովիտը» նկարահանվել է ռեալթի-սարսափ ժանրում: Հիմնականում ընտրել ենք անփորձ դերասանների, ովքեր դեռ ոչ մի տեղ չեն նկարահանվել։ Ինչ-որ տեղ սա փորձարկում է, քանի որ Հայաստանում առաջին անգամ է նկարվում սարափ ֆիլմ»,- ասաց սցենարի հեղինակը՝ Հարություն Ղուկասյանը։
«Մեռյալ հովիտ» կոչվող արգելանոցի տարածքում անհետացել է ավելի քան տասը մարդ: Երբ գտնվել են մահացած մարմինները, բժշկական փորձաքննությունը բռնության հետքեր չի հայտնաբերել, և պարզ է դարձել, որ կորածները մահացել են սրտի կանգից, որի պատճառը կարող էր լինել անսպասելի, ուժեղ վախի զգացողությունը: Մի քանի տարի անց, այդ նույն տարածքում, չորս երիտասարդներ որոշում են իրենց ընկերոջ ծննդյան տարեդարձը նշել...»։
Ֆիլմի ստեղծագործական կազմը կարողացել է գտնել նյութեր և այդ նյութերի հիման վրա նկարահանել ֆիլմը: Գեղարվեստական ֆիլմում տեղ գտած անունները և տեղանունները փոփոխված են:
Ֆիլմը նկարահանել է ռեժիսոր Ռոման Մուշեղյանը: Սցենարը գրվել է Հարություն Ղուկասյանի կողմից, պրոդյուսերի դերում հանդես է եկել Հովհաննես Գրիգորյանը, բեմադրող օպերատորն է Արտո Խաչատուրյանը:
Ֆիլմի Soundtack-ը կատարում է The Beautified Project խումբը: Խմբի մեներգիչ Անդրե Սիմոնյանը նշեց․ «Երգն անպայման կունենա տեսահոլովակ։ Որոշել ենք, որ ֆիլմից հատվածներով հավաքենք։ Իսկ ֆիլմի պրեմիերային հանդիսատեսին սպասվում են հետաքրքիր անակնկալներ»։
