«Ես խնդրեցի, որ նա այդ օրը լինի ամենագեղեցիկը». մանրամասներ հայկական բացառիկ հարսանիքից

13:19   19 նոյեմբերի, 2014

Երեկ NEWS.am STYLE-ը հայկական հարսանիքի բացառիկ տեսանյութ էր հրապարակել, որը, բառիս բուն իմաստով, ցնցել էր համացանցը։ Հարսը հրավիրված է եղել սեփական հարսանիքին՝ առանց նախապես այդ մասին տեղյակ լինելու։ Փեսացուն եւ հարսնացուի բարեկամները խնամքով թաքցրել են դա նորահարսից, ասել են, թե իբր հրավիրված են փեսայի եղբոր հարսանիքին։ NEWS.am STYLE-ը կապվել է յուրօրինակ հարսանիքի մտահղացման հեղինակի՝ փեսա Հայկ Դուրգարյանի հետ եւ մանրամասներ պարզել։


Մեզ հետ զրույցում Հայկն ասաց, որ հարսանցուն՝ Մարինան, իսկապես տեղյակ չի եղել այդ ամենի մասին։ Հայկը շատ էր հոգնել ստանդարտ հարսանիքից եւ այլ՝ յուրօրինակ բան էր ուզում։

«Երկար մտածելուց հետո գտա այն տարբերակը, թե ինչ ձեւով եմ ուզում ամուսնանալ։ Հոգնեցրած ստանդարտից դուրս բան պիտի լիներ։ Կյանքում դա պետք է անել մեկ անգամ եւ որակով»,-նշեց նա՝ հավելելով, որ եթե իմանար, որ սիրելիին դա դուր չի գա, դժվար թե նման կերպ կազմակերպեր իրենց հարսանիքը։

 

Ինչ վերաբերում է հարսնացուի զգեստին, որը շատերի մոտ տպավորություն է թողել, թե հարսանեկան է, Հայկ Դուրգարյանն ասաց, որ դա պարզապես հունական ոճով սպիտակ զգեստ է։ «Ես խնդրեցի, որ նա այդ օրը լինի ամենագեղեցիկը, քանի որ իմ «եղբոր» հարսանիքն էր, եւ ես առաջին անգամ պետք է ներկայացնեի իրեն իմ բարեկամներին»։

 

Հայկը եւ Մարինան ծանոթացել են «շատ հետաքրքիր կերպ», ընկերություն են արել երկար ժամանակ, սակայն Հայկը չցանկացավ մանրամասներ հաղորդել՝ նշելով, որ շուտով ֆիլմ է նկարահանելու իրենց սիրո պատմության մասին։

 Զրուցեց՝ Շուշան Շատիկյանը



© NEWS.am STYLE