Առնո Բաբաջանյան համերգասրահում կայացել է «Կատարողական արվեստի աշխարհի գավաթի 2014թ.» առաջնությունը, որին մասնակցում էին երգի և պարի բնագավառը ներկայացնող 18 օտարերկրյա պետություններից ժամանած մասնակիցներ, իսկ հայաստանյան մասնակիցները ոչ միայն Երևանից էին, այլև` Արցախից, Գյումրիից, Հրազդանից, Վանաձորից, Վեդիից, Արարատից, Արտաշատից, Մասիսից:
Ժյուրիի կազմը ևս տարբեր ազգերի ներկայացուցիչներից էր բաղկացած` Բրազիլիա, Ուկրաինա, Մոլդովա եւ Հայաստան: Մրցույթի կազմակերպիչն էր Արման Ղուկասյանը:
Մասնակիցների ելույթները ներկայցվեցին 6 տարիքային խմբերով: Հայաստանը ներկայացնող փոքրիկ երգչուհի Մերի Քոչարյանը, հանդես գալով 9-12 տարիքային խմբում, զբաղեցրեց առաջին պատվավոր հորիզոնականը` արժանանալով մեդալի և պատվոգրի: Մրցութային փուլի ընթացքում Մերին կատարեց 2 երգ՝ հայերեն և անգլերեն լեզուներով:
Մրցանակաբաշխության ընթացքում, ժուրիի անդամների որոշմամբ, փոքրիկ Մերիին արժանացրեցին ուղեգրերի: Այսպիսով, 2015 թ.-ին Մերի Քոչարյանը Մակեդոնիայում կմասնակցի «Բալթյան երկրների գավաթին» և Բուլղարիայում կայանալիք երգի մրցույթին:
«Շատ ուրախ եմ, որ ներկայացնելու եմ իմ հայրենիքը արտերկրում և, իհարկե, անչափ շնորհակալ եմ իմ վոկալի դասախոս Մերի Կարապետյանին»,-նշել է Մերին: