«Աստծո համար տաքուկ անկյուն չգտնվեց անգամ իր ծննդյան օրը». քահանա

«Աստծո համար տաքուկ անկյուն չգտնվեց անգամ իր ծննդյան օրը». ասում է Սուրբ Երրորդություն եկեղեցու հոգեւոր հովիվ Տեր Եսայի քահանա Արթենյանը՝ լրագրողներին ներկայացնելով Սուրբ Ծնունդի եւ Ամանորի խորհուրդը։

Քահանայի խոսքով, մենք պետք է առավել կարեւորություն տանք սուրբծննդյան տոնի խորհրդին։ «Եկեղեցին չի քարոզում չտոնել Նոր տարին, պարզապես մեր հորդորն է, որպեսզի առավել շատ ուշադրություն դարձնեք տոնի հոգեւոր խորհրդին՝ հետեւեելով Պահքին, քանի որ Նոր տարվա օրերին սուրբծննդյան պահոց շրջանն է»,-նշեց Տեր Եսայի Արթենյանը։

Սուրբծննդյան պահքը սկսվում է դեկտեմբերի 30-ին եւ տեւում մինչեւ հունվարի 5-ը։ Քահանան նշում է, որ մարդկանց համար այդ շրջանում պահք պահելն ավելի դժվար է, քան Սուրբ Զատկի 40-օրյա պահքը, բայց տարեցտարի ավելանում է այն քրիստոնյաների թիվն, ովքեր ե'ւ տոն օրերին պահք են պահում, ե'ւ Ամանորը դիմավորում են եկեղեցում։

Խոսելով Քրիստոսի ծննդյան տոնի մասին, քահանա Արթենյանը նշեց, որ այն մեզ համար պետք է լինի Աստծո ներկայությունը մեր կյանքում տեսնելու եւ մանուկ Հիսուսին մեր սրտերում տաքուկ անկյուն հատկացնելու տոն։ «Երբ նայում ենք Հիսուսի ծննդյան պատկերը, ամեն ինչ շատ վառ է եւ գեղեցիկ։ Սակայն իրականում այդքան հեշտ չի եղել ամեն ինչ։ Երբ հղի Մարիամը դռնեդուռ էր ընկել, որպեսզի իրեն ընդունեն, տեղ տան, ոչ ոք նրա առաջ դուռ չբացեց։ Աստծո համար տաքուկ անկյուն չգտնվեց անգամ իր ծննդյան օրը»,-եզրափակեց քահանան։

Պատրաստեց՝ Շուշան Շատիկյանը