Հայաստանի «Եվրատեսիլ-2015»-ի ներկայացուցչի անունը հայտնի կդառնա այսօր։ Հայաստանի ներկայացուցիչը ելույթ կունենամայիսի 19-ին առաջին կիսաեզրափակչում՝ մրցելով Հունաստանի, Մակեդոնիայի, Էստոնիայի, Հոլանդիայի, Մոլդովայի, Ֆինլանդիայի, Բելգիայի, Սերբիայի, Դանիայի, Ռումինիայի, Ռուսաստանի, Ալբանիայի, Բելառուսի, Վրաստանի եւ Հունգարիայի մասնակիցների հետ։ Եզրափակիչը տեղի կունենա մայիսի 23-ին:
Նշենք, որ Ավստրալիան նույնպես մասնակցելու է «Եվրատեսիլ-2015»-ին, որն այս տարի անցկացվելու է Վիեննայում։
Մրցույթի կազմակերպիչները տեղեկացրել են, որ նման յուրօրինակ քայլի դիմել են այն պատճառով, որ այս տարի կայանալու է «Եվրատեսիլ»-ի 60-րդ հոբելյանական մրցույթը եւ ցանկություն է առաջացել մի նոր շունչ հաղորդել դրան։
«Այս քայլով մենք ցանկանում ենք աշխարհին ասել՝ եկեք միասին տոնենք Եվրատեսիլի հոբելյանը»,-հայտարարել է մրցույթի պրոդյուսեր Իոն Օլա Սանդը։
Այս որոշման դրդապատճառներից մեկն էլ այն հանգամանքն է, որ Ավստրալիայի բնակչությունը մեծապես հետաքրքրված է «Եվրատեսիլ»-ով, որն արդեն 30 տարի է հեռարձակվում է այստեղ եւ երկրպագուների մեծ բանակ ունի։
Ավստրալիան դեռ չի որոշել, թե ով է ներկայացնելու երկիրը, բայց նշենք, որ մասնակիցը միանգամից ելույթ է ունենալու եզրափակչում։ Սակայն նույնիսկ եթե Ավստրալիան հաղթի, միեւնույնն է, «Եվրատեսիլ 2016»-ն այնտեղ չի անցկացվի։ Այս դեպքում կազմակերպիչները կընտրեն եվրոպական մի երկիր։
Աղբյուրը՝ Eurovision.tv