Հարավային Կորեան 2.4 միլիոն ֆունտ ստեռլինգ է վճարել «Վրիժառուները» ֆիլմի ստեղծողներին
16:15 23 ապրիլի, 2015Հարավային Կորեան 2.4 միլիոն ֆունտ ստեռլինգ է վճարել «Վրիժառուներ. Ալթրոնի դարաշրջանը» ստեղծողներին՝ երկիրը դրական տեսանկյունից ներկայացնելու համար։
The Daily Mail-ը տեղեկացրել է, որ «Վրիժառուները. Ալթրոնի դարաշրջանը» ֆիլմի որոշ հատվածներ նկարահանվել են Սեուլում։
Հարավային Կորեայի մշակույթի նախարարությունը համաձայնել է վճարել ֆիլմի ծախսերի մեկ-երրորդը, եթե ֆիլմում Հարավային Կորեան ցուցադրվի ու ներկայացվի որպես «բարձր տեխնոլոգիաներով հարուստ» եւ «ժամանակակից» երկիր։ Մշակույթի նախարարության կինոյի հարցերով զբաղվող հանձնաժողովը վստահ է, որ այս ֆիլմը կարող է փոխել Սեուլի դիրքն ու կարգավիճակը եւ կգրավի Հոլիվուդի ուշադրությունը։
«Եթե Կորեան լավ տեսանկյունից ցուցադրվի այս ֆիլմում, ուրեմն երկրի իմիջը դրականորեն կփոխվի»,- նշված է հանձնաժողովի հայտարարության մեջ։
Լուսանկարները՝ REX