NEWS.am STYLE-ի մասնագետի կարծիքը. RF լիֆթինգ՝ հրաշագործ ռադիոալիքներ
17:13 29 հուլիսի, 2015Կանայք հանուն իրենց գեղեցկության պահպանման պատրաստ են ամեն ինչի՝ անգամ ամենադաժան եւ դժվար քայլի։ Համենայնդեպս, ես կդիմեմ բոլոր մեթոդների օգնությանը՝ չնայած բյութի տեխնոլոգիաների զարգացման շնորհիվ դեռ կարողանում եմ խուսափել ծայրահեղ միջոցներից։ Այսօր ընթերցողների ուշադրությանն եմ ներկայացնում գեղեցկության պահպանման նոր մեթոդներից մեկը՝ RF (Radio Frequency) լիֆթինգը, որն անձամբ եմ փորձել։ Ճիշտ է, իմ պրոցեդուրաները դեռ չեն ավարտվել, բայց արդյունքն ակնհայտ ու գոհացնող է։
RF լիֆթինգը դեմքի, ինչպես նաեւ մարմնի մաշկը ձգելու, ցելյուլիտից ազատվելու հիանալի մեթոդ է։ Իհարկե, ինչպես բոլոր ոչ վիրահատական պրոցեդուրաները, RF լիֆթինգի արդյունքը նույնպես միանգամից նկատելի չէ, սակայն փոքր-ինչ համբերատար լինելու դեպքում փոփոխությունները ակնհայտ կլինեն։
Իհարկե, գաղտնիք չէ, որ տարիքին զուգընթաց մաշկի կոլագեն մանրաթելերը շերտավորվում են եւ այլեւս չեն կարողանում պահպանել մաշկի տոնուսը։ Ռադիոալիքային RF լիֆթինգը օգնում է վերականգնել հենց այս մանրաթելերը։ RF իմպուլսները, անցնելով հյուսվածքներով եւ խոչընդոտների հանդիպելով, մինչեւ 650 С տաքացնում են հյուսվածքները։ Արդյունքում, կոլագեն մոլեկուլները վերածվում են ամուր պարույրների՝ ապահովելով մաշկի լիֆթինգը։
Պրոցեդուրան անցավ է. դուք միայն ջերմություն եւ թեթեւ ծակոցներ եք զգում. անհանգստության ոչ մի զգացում։ Նշեմ, որ պրոցեդուրայից հետո հետքեր չեն մնում, իսկ կուրսը սկսելու համար ոչ մի նախնական պատրաստվածություն հարկավոր չէ։ Պրոցեդուրան տեւում է 10 րոպեից մինչեւ 2 ժամ՝ կախված մշակվող հատվածի մեծությունից։ Լավ արդյունքի հասնելու համար պահանջվում է 5-12 կուրս։ Անձամբ ինձ նշանակվեց 10 պրոցեդուրա, բայց երրորդից հետո փոփոխություններն արդեն նկատելի էին։ Արդյունքում, ազատվեցի մաշկի թեփոտումից եւ մոխրագույն երանգից։ Կուրսն ընդունելուց հետո պետք է խուսափել արեւի ճառագայթներից (օրինակ, ես ուլտրամանուշակագույն ճառագայթների դեմ նախատեսված հատուկ քսուքներ եմ օգտագործում) եւ հրաժարվել սաունա գնալուց։ Երեւանում մեկ նմանատիպ պրոցեդուրայի համար պետք է վճարել 5000-10000դրամ։
Յուլիա Վարդանյան