Թոնի Բրեքսթոնի անցած ուղին և լավագույն հիթերը.Թոնի Բրեքսթոնն այսօր դարձավ 48 տարեկան
20:16 7 հոկտեմբերի, 2015«Unbreak My Heart», «You’re Making Me High», «Spanish Guitar», «How Could an Angel Break My Heart» և մի շարք այլ հիթերի կատարող Թոնի Բրեքսթոնն այսօր դարձավ 48 տարեկան:
Իր կարիերայի ընթացքում ամերիկացի երգչուհին արժանացել է ինը «Billboard Music Awards», յոթ «American Music Awards» և նույնքան էլ «Գրեմմի» մրցանակների:
Թոնի Բրեքսթոնը հայտնի դարձավ 90-ականներին: Այս ընթացքում երգչուհին վաճառել է 67 միլիոն ձայնագրություններ, այդ թվում` 40 միլիոն ալբոմ:
1996 թ-ին նրա «Unbreak My Heart» հիթը ճանաչվել է բոլոր ժամանակների` թվով երկրորդ ամենաշատ վաճառված սինգլը:
Բրեքսթոնն աչքի է ընկնում իր բարձր ճաշակով: 2011 թ-ին նա ճանաչվեց «Գրեմմի» մրցանակաբաշխության տասը տարիների ամենանորաձև աստղերից մեկը:
2001 թ-ին Թոնի Բրեքսթոնն ամուսնացավ երաժիշտ Քերրի Լյուիսի հետ: Նույն թվականին ծնվեց նրանց առաջնեկը` Դենիմը: 2002 թ-ին Թոնին կրկին հղիացավ, սակայն այս անգամ հղիության ընթացքը ծանր եղավ երգչուհու համար: Զույգի երկրորդ որդին` Դիզելը, ծնվեց 2003 թ-ին` աուտիզմ ախտանիշով: Դրանից հետո Բրեքսթոնը դարձավ «Autism Speaks» կազմակերպության անդամ: Նա համարվում է այդ կազմակերպության միջազգային խոսնակը:
2013 թ-ին Բրեքսթոնն ու Լյուիսը պաշտոնապես ամուսնալուծվեցին:
2011 թ-ին ամերիկյան «WE tv» հեռուստաալիքը սկսեց հեռարձակել «Braxton Family Values» իրական շոուն, որի հերոսներն են Բրեքսթոն քույրերը` Թոնին, Թամարը, Թրեյսին, Թոուանդան, Թինան և նրանց մայրը` Էվելինը:
Հեռուստաշոուն առայժմ ունի 4 եթերաշրջան:
Սյունե Առաքելյան