Ջոն Լենոն. Լեգենդար երաժիշտն այսօր կդառնար 75 տարեկան
10:41 9 հոկտեմբերի, 2015Ճիշտ են ասում, որ կան երաժիշտներ, որոնք անմահ են: Նրանցից մեկը բրիտանացի ռոք երաժիշտ, երգերի հեղինակ, հանրահայտ The Beatles խմբի համահիմնադիր և անդամ Ջոն Լենոնն է:
Նա պատկերացրեց, թե ինչ կլիներ, եթե չլիներ երկինքը, եթե մարդիկ ապրեին մեկ օրով, եթե չլինեին պետություններ, և մարդիկ ապրեին խաղաղության համար… նրա պատկերացումներն օգնեցին ստեղծել աշխարհի ամենակախարդական ու բարի երգերից մեկը` «Imagine»-ը: Այն ճանաչվել է բոլոր ժամանակների և ազգերի լավագույն երգը:
Ջոն Լենոնն այսօր կդառնար 75 տարեկան, սակայն 1980 թ-ին տեղի ունեցած ողբերգական սպանությունը ֆիզիկապես խլեց երաժիշտի կյանքը: Սպանության օրը` դեկտեմբերի 8-ին, Ջոնն ու կինը` Յոկո Օնոն, մասնակցում էին «Rolling Stone» ամսագրի ֆոտոշարքին: Այդ նկարահանումից 5 ժամ անց տեղի ունեցավ երաժիշտի սպանությունը: Ամսագրի շապիկի լուսանկարը հանրությանը ներկայացվեց 1981 թ-ին, իսկ այսօր տվյալ լուսանկարը գտնվում է «Swann Auction Galleries»-ի ցուցասրահում:
Լենոնին սպանել է Մարկ Դևիդ Չեպմեն անունով երկրպագուն: Սպանության օրը նա նույնիսկ ստորագրություն է վերցրել Լենոնից: Չեպմենը Ջոնի մեջքին 5 անգամ կրակել է: Երաժիշտը մահացել է արյունահոսությունից: Այսօր Չեպմենը կրում է իր պատիժը Նյու Յորքի կալանավայրերից մեկում:
The Beatles խումբը Լենոնը հիմնել է Փոլ ՄքՔարթնիի, Ջորջ Հարրիսոնի և Ռինգո Սթարի հետ: Նրանք հայտնի դարձան որպես «Լիվերպուլյան քառյակ»:
Երաժիշտը խմբի վատագույն երգերն էր համարում «Run For Your Life»-ն ու «It’s Only Love»ը:
Մինչ օրս էլ Ջոն Լենոնն այնքան սիրված է, որ նրա ինքնանկարը վաճառվել է 5 միլիոն դոլարով, իսկ նրա կողմից արված մյուս բոլոր նկարներից յուրաքանչյուրը` 3 միլիոն դոլարով:
Սյունե Առաքելյան