«Մանկական Եվրատեսիլ 2015» երաժշտական մրցույթում երկրորդ տեղը զբաղեցրած Միկան երեկ՝ նոյեմբերի 22-ին, վերադարձել է Երեւան: Ու թեեւ Մոսկվայի չվերթը ուշացավ շուրջ կես ժամով, տաղանդավոր արտիստի բազմաթիվ երկրպագուները (նկատենք՝ ամենատարբեր տարիքի) համբերատար սպասում էին նրա հայտնվելուն:
Հենց որ Միկան իր Love երգի հնչյունների ներքո հայտնվեց «Զվարթնոց» օդանավակայանի սպասասրահում, նրան մարդիկ դիմավորեցին փուչիկներով, պաստառներով, ծաղիկներով ու նվերներով, իսկ մեր տեսախցիկն արձանագրեց տեղի ունեցողը:
«Մրցույթը շատ բարդ էր, բոլոր մասնակիցներն էլ շատ ուժեղ էին: Ես կարծում եմ, որ Մալթան արժանի էր հաղթանակի, իսկ ես ուրախ եմ, որ երկրորդ տեղը զբաղեցրի»,-նշել է Միկան եւ շնորհակալություն հայտնել երկրպագուներին իրեն աջակցելու համար:
Լուսանկարները՝ Արսեն Սարգսյանի