Ինչպիսի առատաձեռնություն...
Տեխասից 18-ամյա Ալիշա Փալմերը դպրոցն ավարտելուց մեկ ամիս առաջ հիանալի ավարտական նվեր է ստացել անծանոթ հաճախորդից։
Ալիշան, որը համալսարան ընդունվելու համար աշխատում է որպես մատուցողուհի տեղի իտալական ռեստորաններից մեկում, օրեր առաջ որպես թեյավճար 1000 դոլար է ստացել։ Աղջիկը շաբաթական 30 ժամ աշխատում է, որպեսզի կարողանա ընդունվել բիզնես քոլեջ, ստանա համապատասխան կրթություն եւ աստիճան, ինչից հետո կարողանա սեփական հրուշակաեղենի խանութը բացել։
Ապրիլի 9-ին Փալմերը երկու սեղան էր սպասարկում, եւ մինչ նա իրենց մշտական հաճախորդներից մեկին պատմում էր ապագա ծրագրերի մասին, մյուս սեղանի այցելուն մոտեցել է դրամարկղին՝ իր պատվերի դիմաց վճարելու։ Անծանոթը մի քանի վայրկյան ռեստորանի սեփականատիրոջ հետ զրուցելուց հետո հեռացել է։
Աղջիկը, մտածելով, որ տղամարդը բողոքել է իր վատ սպասարկումից, հարցրել է՝ միգուցե դժգոհություններ կան։ Եվ հենց այդ վայրկյանին աղջիկն իմացել է իր մեծ եւ անչափ հաճելի անակնկալի մասին.
«Նա ցույց տվեց կտրոնը։ Ես աչքերս լայն բացած կանգնել եմ։ Սկսեցի լաց լինել հենց ռեստորանի մեջտեղում»,- հիշում է երջանիկ Ալիշան։
Մի քանի օր անց աղջիկը ստացել է 1000դոլարը, որը ռեստորանի գործունեության ընթացքում ամենաշատն է եղել։
Ի դեպ, անծանոթը նախընտրել է անհայտ մնալ եւ այդ պատճառով աղջիկը փորձում է պարբերականների միջոցով արտահայտել իր երախտագիտությունը։
Աղբյուրը՝ Daily mail
Պատրաստեց՝ Յանա