«Եվրատեսիլ 2016». Եվրոպական հեռարձակողների միությունը հեռացրել է արգելված դրոշների մասին հաղորդագրությունը
16:32 30 ապրիլի, 2016«Եվրատեսիլ» միջազգային մրցույթի կազմակերպիչները երեկ ներկայացրել են այս տարվա դրոշային քաղաքականությունը: Հեռարձակողների եվրոպական միությունը (EBU) արգելել է մրցույթի կիսաեզրաափակչի ու եզրափակչի ժամանակ դահլիճ բերել Արցախի, Պաղեստինի, Ղրիմի ու Բասկերի երկրի դրոշները:
TVE Իսպանական ալիքը հայտնում է, որ EBU-ն կարգադրել է Globe Arena կայքից հեռացնել դրոշների մասին տեղեկությունը այն բանից հետո, երբ Իսպանիայի իշխանությունները պահանջել են շտկել այդ սխալն ու հիշեցրել, որ Բասկերի երկրի դրոշը երկրի ինքնավար համայնքներից մեկի պաշտոնական խորհրդանիշն է:
Մոտ ժամանակներս Eurovision.tv–ի պաշտոնական էջում տեղադրվելու է ճշտված հաղորդագրությունը՝ մրցույթում արգելված խորհրդանիշների վերաբերյալ:
EBU-ն նաեւ ներողություն է խնդրել նրանցից, ում զգացմունքները վիրավորել է այս ցանկի հրապարակումով: Արդյոք դա միայն Բասկերի երկրի դրոշին է վերաբերում, թե բոլոր մյուս արգելված դրոշներին, մենք կիմանանք մոտ ժամանակներս: