Արդյո՞ք կհաղթեր նման ենթատեքստ ունեցող երգ, եթե այն ներկայացներ այլ երկիր. «Եվրատեսիլ 2016»-ում Խորվաթիայի մասնակից

«Եվրատեսիլ» երգի մրցույթն արդեն անցյալում է, սակայն դրա շուրջ ծավալվող խոսակցությունները դեռեւս շարունակվում են:

NEWS.am STYLE-ի թղթակիցները Ստոկհոլմից վերադառնալու ճանապարհին ինքնաթիռում հաճելի հանդիպում ունեցան մրցույթում Խորվաթիան ներկայացնող Նինա Կրալիչի հետ, որի ձայնը եւս տպավորել էր մրցույթի երկրպագուներին: Իհարկե, չէինք կարող առիթը բաց թողնել եւ չհարցնել, թե ինչ է կարծում հմայիչ երգչուհին «Եվրատեսիլի» արդյունքների մասին.

«Ոչինչ չունեմ Ջամալայի դեմ: Նա հիանալի երգչուհի է, որն ունի ձայնային հրաշալի տվյալներ, սակայն մի հարց ունեմ ԵՀՄ-ին. Ինչպե՞ս կարող ենք վստահ լինել, որ եվրոպական ժյուրիի քվեարկության արդյունքներն արդար են: Ամեն տարի կազմակերպիչները որոշում են նվազեցնել մրցույթի քաղաքական կոնտեքստը, սակայն գրեթե ամեն տարի հաղթող է ճանաչվում մի երգ, որը ոչ թե խաղաղություն է քարոզում, այլ ընդհակառակը՝ լարվածություն է առաջացնում մրցույթի շրջանակներում: Ռուսաստանի եւ Ուկրաինայի միջեւ խաղաղություն հաստատելու փոխարեն կրքերն ավելի են բորբոքել, ինչն անընդունելի է, քանի որ այդ լարվածությունը զգում են ոչ միայն Ռուսաստանի եւ Ուկրաինայի ներկայացուցիչները, այլեւ նրանք, ովքեր առհասարակ ոչ մի կապ չունեն այդ կոնֆլիկտի հետ: Ջամալայի երգը պատմություն է, որն ունի քաղաքական կոնտեքստ. Այս փաստը կազմակերպիչներն անտեսել են: Կրկնում եմ՝ Ջամալան հրաշալի երգչուհի է, բայց արդյոք նրա երգը հիշվե՞լ է ինչ-որ մեկի կողմից: Կարծում եմ՝ երկրպագուներին առավել տպավորել են Ավստրալիայի, Բուլղարիայի եւ Ռուսաստանի երգերը: Ի դեպ, ամեն ինչ ավելի լավ լուծում կստանար, եթե Ավստրալիայի ներկայացուցիչը հաղթեր: Մենք եկել էինք՝ երգելու սիրո եւ խաղաղության մասին, սակայն բոլորովին այլ կոնտեքստ ունեցող երգ հաղթեց:

Հետաքրքիր է՝ արդյո՞ք կհաղթեր նման ենթատեքստ պարունակող երգ, եթե այն ներկայացներ այլ երկիր»,-նշեց երգչուհին: