Ֆրանսիահայ նշանավոր շանսոնյե Շառլ Ազնավուրն այսօր տոնում է ծննդյան 92-ամյակը:
Ազնավուրն ամբողջ աշխարհում Հայաստանի դեմքն ու խորհրդանիշն է համարվում: Տաղանդավոր երաժիշտն իր հայտնիության միջոցով աշխարհին է ներկայացնում Հայաստանը, մեր մշակույթն ու Հայոց ցեղասպանության փաստը: Նրա աշխարհահռչակ հիթերն են Isabelle, She, La Boheme, Une Vie D'Amour, որը զուգերգ է հայտնի երգչուհի Միրեյ Մատյոյի հետ:
Ազնավուրը նաեւ հայտնի է մի շարք ֆիլմերից` «Կրակեք դաշնակահարի վրա», «Արարատ», «Արկածներ որոնողները», «Գլուխը պատին» եւ այլն:
Չնայած իր հռչակին` երաժիշտը շարունակում է մնալ նույն համեստ եւ հասարակ հայը, որով հպարտանում են իր բոլոր հայրենակիցները եւ որի պատվին կոչել են Երեւանի հրապարակներից մեկը:
Ազնավուրն ասել է`
«Երբեք ոչինչ չեմ ունեցել, անգամ իմ տարիները…»:
«Մյուզիքլը ժանր է նրանց համար, ովքեր չեն կարողանում երգել»:
«Անգամ, երբ մտածում ենք, թե սպասելիքներ չունենեք, մենք միեւնույն է սպասում ենք ինչ-որ բանի կամ ինչ-որ մեկին»:
«Կյանքում պետք է ազատվել ցանկացած խառնաշփոթից»:
«Իմ սիրած երգիչը ես եմ»:
«Մենք ժպիտով բաց ենք թողնում մեր մանկությունը` չգիտակցելով, որ երիտասարդությունն էլ է արագ անցնում: Չես էլ հասցնում հասկանալ, թե երբ եւ ինչպես…»
Սյունե Առաքելյան