Նա հայկական շոու-բիզնեսի խաղաղության աղավնին էր. Անդրեն` Վարդուհի Վարդանյանի մասին

Այսօր սիրված երգչուհի Վարդուհի Վարդանյանի ծնունդն է:  Նա կդառնար 40 տարեկան, եթե տասը տարի առաջ տեղի ունեցած սարսափելի ավտովթարը չխլեր երիտասարդ եւ տաղանդավոր երգչուհու կյանքը:

Վարդուհին, ցավոք, ֆիզիկապես մեզ հետ չէ, սակայն նա ապրում է այնքան, որքան իրեն հիշում են ընկերներն ու մտերիմները, որքան որ ապրում են նրա երգերը…

Շոու-բիզնեսում Վարդուհու ամենամտերիմ ընկերներից էր երգիչ Անդրեն, որը մինչ օրս հիշում է իր ջերմ, անկեղծ եւ կյանքով լի ընկերուհուն: Իր լավագույն ընկերոջ մասին հուշերով Անդրեն կիսվեց NEWS.am STYLE-ի հետ.

«Բարի, կամեցող, համառ եւ իսկական… Կարոտում եմ Նրան շատ, նա, իսկապես, անփոխարինելի ընկեր էր ինձ համար: Գաղտնիք չէ, որ շատ քիչ կամեցող մարդիկ կային կողքիս այս ասպարեզում, եւ երբ ինչ-որ մեկն իմ անվան շուրջ փորձում էր ինչ-որ բան ասել Վարդուհու ներկայությամբ, նա միանգամից բոլորին սաստում էր եւ թույլ չէր տալիս, որ իմ մասին բամբասեին…Դրա համար շատ նեղ շրջանակներում Վարդուհուն անվանում էին «Անդրեի վկա»…»

Անդրեն չմոռացավ հիշատակել նաեւ լավագույն ընկերուհու ձայնային տվյալները, որի համար շատերն էին նախանձում երգչուհուն.

«Չնայած երիտասարդ տարիքին` նա բազում միջազգային մրցանակներ ուներ: Երբեք դատարկ ձեռքերով չի վերադարձել Հայաստան եւ միշտ մեր դրոշն ու պատիվը բարձր է պահել: Վարդուհին շատ աշխատասեր էր: Կարող էր նույնիսկ ամենասեղմ ժամանակահատվածում երգեր ձայնագրեր: Ահա, թե ինչու անգամ իր վաղաժամ հեռանալուց հետո նրա ձայնասկավառակները դեռ թողարկվում են»:

Վարդուհի Վարդանյանը բեմում կատարյալ էր ցանկացած պարագայում: Նույնիսկ հղիության շրջանում երգչուհին չէր դադարում երգել` այն էլ բավականին հզոր ձայնով.

«Ես միշտ հպարտանում էի նրանով: Նա այն երգչուհին էր, որը հղիության իներորդ ամսում բեմի վրա կենդանի ձայնով երգեց Adajio-ն…»:

Անդրեն հիշեց նաեւ մի դեպք, երբ ընկերուհին ցանկացած գնով փորձել է իրեն օգնության հասնել.

«Մի օր վատառողջ էի եւ շտապ օգնություն էինք կանչել, բայց այն շատ էր ուշանում: Երբ Վարդուհին այդ մասին իմացել է, չգիտեմ էլ, թե ինչպես քաղաքի կետրոնում կանգնեցրել է շտապ օգնության մեքենան եւ հասցրել է մեր տուն:

Երանի հնարավոր լիներ բացի հուշերից վերապրել այս ամենն իրականում…Նա հայկական շոու-բիզնեսում խաղաղության աղավնի էր…»:

Սյունե Առաքելյան