«Վամպիրի օրագրերը» հեռուստասերիալի աստղ Փոլ Ուեսլին նշում է ծննդյան 34-ամյակը
15:34 23 հուլիսի, 2016Ուրիշ էլ ո՞վ, եթե ոչ այս խորհրդավոր արտաքինով եւ մտահոգ հայացքով երիտասարդը պետք է մարմնավորեր «Վամպիրի օրագրերը» հեռուստասերիալի գլխավոր հերոսին` Ստեֆան Սալվատորեին: Հեռուստասերիալի մեկնարկից անմիջապես հետո Փոլ Ուեսլին իր ձեռքերում արդեն պահում էր հազարավոր երկրպագուհիների սրտեր:
Այսօր սիրված սրտակերը նշում է ծննդյան 34-ամյակը:
«Վամպիրի օրագրերի» երկրպագուներին առաջարկում ենք հետեւել մեր հոդվածին, որը նվիրված է Փոլ Ուեսլիին:
Փոլի ամբողջական անունը Պավել Թոմաս Վասիլեվսկի է. այստեղից էլ պարզ է դառնում, որ ամերիկացի դերասանն ունի լեհական ծագում:
Բացի վերը նշված հեռուստասերիալից` Ուեսլին նկարահանվել է նաեւ մի շարք այլ ֆիլմերում, որոնցից են` «Ընկածը», «Կապույտի ներքո», «Ջրահարսը», «Ամերիկյան երազանքներ», «Երիտասարդ Արթուրը» եւ այլն:
2014 թ-ին Փոլը նկարահանվեց «Մինչեւ ես կանհետանամ» ֆիլմում, որի պրոդյուսերական աշխատանքներով եւս զբաղվել է դերասանը:
Ուեսլին ակտիվորեն խաղում է նաեւ ներկայացումներում: Նա եղել է Շեմ Բիթերմանի «Զգայուն Մաշկը» հայտնի պիեսի գլխավոր դերակատարը:
Ինչ վերաբերում է Փոլի անձնական կյանքին` նշենք, որ 2007 թ-ին դերասանը հանդիպում էր դերասանուհի Թորի Դեվիտոյի հետ. միասին նրանք նկարահանվել են Killer Movie ֆիլմում: Թորին նաեւ նկարահանվել է «Վամպիրի օրագրերի» մի քանի էպիզոդներում: Սերիալների երկրպագուները Դեվիտոյին տեսել են նաեւ «Փոքրիկ խաբեբաները» ամերիկյան հեռուստասերիալում, որտեղ նա մարմնավորում է Մելիսային:
2011 թ-ին կայացավ դերասանների սպասված հարսանիքը, սակայն գեղեցիկ զույգի ամուսնությունը երկար պատմություն չունեցավ: Նրանք ամուսնալուծվեցին 2013 թ-ին:
Գեղեցկադեմ դերասանը, սակայն, երկար միայնակ չմնաց: Շուտով նա «Վամպիրի օրագրերը» հեռուստասերիալի նկարահանման հրապարակում հանդիպում է գեղեցկուհի Ֆոեբ Տոնկինին: Նրանց սիրավեպը սկիզբ առավ 2013 թ-ի սեպտեմբերից:
Փոլ Ուեսլին մինչ օրս շարունակում է նկարահանվել «Վամպիրի օրագրերում»: Այնպես որ` երկրպագուները Ուեսլիին, կարծես թե, դեռ երկար են տեսնելու խորհրդավոր վամպիրի կերպարում:
Սյունե Առաքելյան