Այսօր Մայքլ Ջեքսոնը կդառնար 58 տարեկան. Փոփի արքայի TOP 10 լավագույն հիթերը
16:15 29 օգոստոսի, 2016«Ես սկսում եմ հայելու միջից ինձ նայող մարդուց:
Ես խնդրում եմ նրան փոխել իր հայացքները:
Ոչ մի հաղորդագրություն ավելի պարզ չի կարող լինել…
Եթե ցանկանում ես աշխարհը դարձնել լավ վայր,
Նայիր ինքդ քեզ, նոր միայն կատարիր փոփոխություն»:
Փոփոխություն` ահա թե ինչի մասին էր երգում Մայքլ Ջեքսոնն իր հանրահայտ` Man in the Mirror երգում: Փոփոխություն` մի բան, որ այդքան հատուկ էր Փոփի արքային, որն այսօր կդառնար 58 տարեկան:
Մայքլ Ջեքսոնի մահվանից անցել է 7 տարի, սակայն այս տարիների ընթացքում երաժշտասերները ոչ մի վայրկյան անգամ չեն զգացել, որ արքան այլեւս կենդանի չէ: Սա, իրոք, այն դեպքն է, երբ երաժիշտը հավերժ կենդանի է իր ստեղծած երաժշտության շնորհիվ:
Ջեքսոնը ծնվել է 1958 թ-ին` Ջոզեֆ եւ Քեթրին Ջեքսոնների ընտանիքում: Տասը երեխաներից բաղկացած այս ընտանիքում նա ութերորդ երեխան էր: Իր կարիերան հայտնի երգիչը սկսել է The Jackson 5 խմբից, որտեղ նրա հետ միասին ելույթ էին ունենում ավագ եղբայրները` Ջեքի, Տիտո, Ջերմեյն եւ Մառլոն Ջեքսոնները:
Սակայն շարժուն եւ ինքնատիպ երգիչը, պարզապես, կկորեր խմբի կազմում: Այսպիսով` 1970-ական թ-երի վերջին Մայքլը սկսում է հանդես գալ` որպես անհատ կատարող: Եւ ահա ծնվում են երգչի լավագույն հիթերը` Don’t Stop Till You Get Enough, Rock With You, Off The Wall, Billie Jean, Beat It… եւ այսպես շարունակ…
Հասարակությունը, սակայն, քննարկում էր Ջեքսոնի ոչ միայն ստեղծագործական, այլեւ անձնական կյանքը: Մի մասը նրան մեղադրում էր ռասիզմի մեջ` փաստելով այն, որ երգիչը փոխել էր մաշկի գույնը, մինչդեռ ինքը` Մայքլը, դա բացատրում էր մաշկային հիվանդությամբ: Այնուհետեւ բուռն սկսեցին քննարկել, թե երգիչը մանկապղծության է ենթարկում տղա երեխաներին, ինչը Ջեքսոնին բազմիցս կանգնեցրեց դատարանի դռների առջեւ:
Այս մեղադրանքներն ու ճնշումներն, իհարկե, իրենց հետքը թողեցին Փոփի արքայի առողջության վրա:
Երգչի սիրտը չդիմացավ 2009 թ-ին: Հունիսի 25-ին նրան գտան տանը` անշնչացած վիճակում: Երկրպագուներից շատերը ծանր տարան Մայքլի մահվան լուրը: Ոմանք դիմեցին, նույնիսկ, ծայրահեղ քայլերի:
Ամբողջ աշխարհում երգչի հիշատակին նվիրված արարողություններ կազմակերպվեցին: Ի դեպ, ետ չմնացին նաեւ Ջեքսոնի հայ երկրպագուները...
Հենց նրանց համար էլ ձեր ուշադրությանն ենք ներկայացնում Մայքլ Ջեքսոնի TOP 10 ամենասիրված հիթերը:
Ծնունդդ շնորհավոր, Փոփի արքա…
Սյունե Առաքելյան