Շուտով սեպտեմբերի 1-ն է` օր, որը դպրոցականների եւ ուսանողների համար նշանակում է նոր ուսումնական տարվա սկիզբ: Իսկ ի՞նչ տեսքով գնալ բուհ այս խորհրդանշական օրը, հատկապես, երբ այն քո կյանքի առաջին սեպտեմբերի 1-ն է լինելու:
Ձեզ այս հարցում օգնելու համար զրուցեցինք ոճաբան Արմինե Մարտիրոսյանի հետ.
«Առաջին հերթին բուհ գնում են սովորելու համար, ուստի լավ կլինի, որ հագնվեն այնպես, ինչպես հարմար է: Իսկ առաջին օրն ավելի տոնական տեսք ունենալու համար խորհուրդ կտամ սպիտակ բլուզը կամ վերնաշապիկը համադրել որեւէ աքսեսուարով, օրինակ` մեծ բրոշով, ինչը չէին կարող կրել դպրոցում»:
Արմինեն ողջունում է այն փաստը, որ վերջին տարիներին հայ ուսանողուհիների պահարաններից պակասել են բարձրակրունկ կոշիկներն ու երեկոյան զգեստները.
«Հիմա ավելի նորաձեւ է սպորտային կոշիկների եւ կիսաշրջազգեստների համադրությունը, ինչի արդյունքում ստացվում է մոդայիկ եւ հարմարավետ կերպար»:
Արմինեի հետ զրուցեցինք նաեւ աշակերտուհիների կերպարներից.
«Նրանց կարող եմ առաջարկել, որ կիսաշրջազգեստների եւ վերնաշապիկների հետաքրքիր լուծումների դիմեն, բայց ոչ մի դեպքում դասի գնալիս չպետք է սպիտակ վերնաշապիկը փոխարինել այլ գույնի բլուզով, քանի որ դա դպրոց է: Եւ հետո վստահ եմ` դպրոցն ավարտելուց հետո նրանք դեռ շատ կկարոտեն սեւի եւ սպիտակի համադրությունը:)»:
Սյունե Առաքելյան