Անկախությունն ինձ համար արժանավայել ապրելու խորհրդանիշ է. Ջուսը ՀՀ անկախության 25-ամյակին նվիրված տեսահոլովակ կներկայացնի

12:08   21 սեպտեմբերի, 2016

«Հայաստան»` այսպես է կոչվում Ջուսի նոր տեսահոլովակը, որը նվիրված է Հայաստանի անկախության 25-ամյակին: Երգչուհու նոր աշխատանքը երկրպագուներին հասանելի կլինի շատ շուտով, իսկ մինչ այդ Ջուսի հետ զրուցեցինք նոր երգի, տեսահոլովակի, եւ, առհասարակ, անկախության մասին.

«Ինձ միշտ հարցնում էին, թե երբ եմ երգելու հայերեն, ես էլ պատասխանում էի, որ այդ դեպքում դա պետք է լինի շատ հզոր երգ: Հենց այդպիսին է տաղանդավոր երգահան Աղասի Գեւորգյանի «Հայաստան» երգը, որը գրվել է հատուկ ինձ համար»,-նշեց երգչուհին:

Ջուսի նոր երգի գործիքավորումը կատարել է Գուժը, տեսահոլովակի ռեժիսորը Լաերտ Համբարյանն է, օպերատորը` Վարդգես Մանուկյանը: Տեսահոլովակում Ջուսին կտեսնենք բոլորովին նոր կերպարով.

«Կերպարիս վրա աշխատել են դիզայներ Գայանե Կարապետյանը, իմ վարսահարդար-ոճաբան Սերժ Հարությունյանը եւ դիմահարդար Ասյա Աճեմյանը: Այս հիանալի թիմի շնոհիվ ես կներկայանամ նորովի»:

Քանի որ երգչուհու նոր աշխատանքը Հայաստանի մասին է եւ նվրված է մեր անկախության 25-ամյակին` Ջուսից հետաքրքրվեցինք, թե ինչ է իր համար, առհասարակ, անկախությունը.

«Բարդ հարց է… անկախությունն ինձ համար արժանավայել ապրելու խորհրդանիշ եւ հնարավորություն է»:

Ջուսի համար հուսադրող է այն փաստը, որ մենք ունենք հզոր բանակ եւ հայրենիքին նվիրված զինվորներ.
«Ես կցանկանայի տեսնել իմ հայրենիքն այն կարգավիճակում, ինչպիսին այլ քաղաքակիրթ երկրներն են: Ինձ համար, իրոք, հուսադրող է մեր զինվորների նվիրվածությունը հայրենիքին, որն անկոտրուն է»:

Սյունե Առաքելյան



© NEWS.am STYLE