Երեկ երեկոյան Մայքլ Քեյնի Twitter-ի գրառումը ցնցեց համացանցի հայկական տիրույթները: Հոլիվուդյան դերասանը Երեւանում էր:
«Ողջույն գեղեցիկ Հայաստանից»,-գրել էր նա:
Մինչ «Բեթմեն» եւ մի շարք այլ ֆիլմերից հայտնի դերասանի երկրպագուները փորձում էին պարզել նրա գտնվելու վայրը` Քեյնը հանդես եկավ նոր գրառմամբ` տեղեկացնելով, որ արդեն լքում է Հայաստանը եւ մեկնում է Լոնդոն:
Այնուամենայնիվ, մեզ հայտնի էր դարձել, որ մեկնելուց առաջ հոլիվուդյան աստղը հասցրել էր ընթրել «Դոլմամա» ռեստորանում:
NEWS.am STYLE-ն այսօր այցելեց ռեստորան եւ դերասանի այցի մանրամասների շուրջ զրուցեց «Դոլմամա»-ի տնօրեն Ժիրայր Ավանյանի հետ.
«Դերասանն այստեղ էր եկել կնոջ հետ։ Մեզ մոտ նա համտեսել է գառան թիակ, սմբուկով ռոլիկներ, լոլիկ, այծի պանիր, ինչպես նաեւ դոլմա է համտեսել եւ ըմպել է կարմիր գինի։ Դերասանը շատ գոհ էր հյուրասիրությունից։ Նրան ամենից շատ դուր է եկել գառան թիակը»,-նշեց պարոն Ավանյանը՝ ավելացնելով, որ տեղյակ չէ, թե ինչու էր Քեյնը այցելել Երեւան, սակայն նրա այցը ռեստորան, անակնկալ է եղել անձնակազմի համար։
Ժիրայր Ավանյանը նաեւ մեզ տրամադրեց բացառիկ լուսանկարներ՝ դերասանի եւ նրա տիկնոջ հետ։
Սյունե Առաքելյան