Գեղեցիկ մարդկանց կյանքը հաճախ սարսափելի է. Մոնիկա Բելուչին այսօր դարձավ 52 տարեկան
15:05 30 սեպտեմբերի, 2016Գեղեցկություն, որը չի խամրում, այլ տարիների հետ ավելի է ծաղկում: Կանացիություն, որը բնատուր է, իսկ տարիների հետ ավելի գրավիչ է դառնում. այո, իհարկե, խոսքը Մոնիկա Բելուչիի մասին է: Այս շքեղ կինն այսօր նշում է ծննդյան 52-ամյակը:
Ուրիշ էլ ո՞վ, եթե ոչ իտալացի գեղեցկուհին կարող է լավագույնս արտահայտվել գեղցկության եւ հմայքի մասին:
Մոնիկայի ամենահայտնի մտքերը ներկայացնում ենք ձեր ուշադրությանը.
«Գիտեմ, որ գեղեցիկ մարդկանց կյանքը հաճախ սարսափելի է: Նրանք այնքան անհարմարավետ են զգում իրենց սեփական մաշկի մեջ: Իսկ հարմարավետությունը ոչ թե արտաքինի, այլ ներքինի մեջ է»:
«Ես ինձ հարմարավետ եմ զգում, բայց ոչ այն պատճառով, որ գեղեցիկ եմ»:
«Ես միշտ սիրել եմ շրթներկ կրել: Կարծում եմ՝ ցանկացած կին դա սովորում է իր մայրիկից եւ տատիկից: Կնոջ համար այնքան սովորական երեւույթ է նայել հայելու մեջ եւ անկախ ամեն ինչից՝ շուրթերը ներկել գեղեցիկ երանգով»:
«Շրթներկը կնոջ ամենաուժեղ զենքն է: Այն կարող է ամբողջովին փոխել քո տեսքը՝ առաջացնելով շրջապատի հիացմունքը»:
«Տղամարդը հիանում է՝ տեսնելով կարմիր շրթներկով կնոջ: Բայց նա հաճախ չի համարձակվում համբուրել նրան»:
«Ես երբեք խուճապի չեմ մատնվում իմ արտաքինի պատճառով: Ես սիրում եմ ծիծաղել: Ինձ համար շատ կարեւոր է կյանքս հետաքրքրացնելը»:
«Կարծում եմ՝ ժամանակը ոչինչ չի խնայում: Վերցնենք, օրինակ, մի գեղեցիկ կարմիր խնձոր: Որոշ ժամանակ անց դրան թոշնած կգտնենք: Ահա, թե ինչ է լինում մեզանից յուրաքանչյուրի հետ»:
«Իմ մարմինը գեղեցիկ վիճակում է եւ ես այն չեմ սիրում շեշտել վառ գույներով: Ինձ համար իդեալական երանգներ են սեւն ու սպիտակը»:
«Իմ մարմինն ինձ համար շատ կարեւոր է՝ դեմքս, ձեռքերս, ոտքերս, աչքերս... ես ամեն ինչ էլ գործի եմ դնում»:
«Գեղեցիկ է այն, ինչ բնական է: Եթե դու այլեւս այնպիսին չես, ինչպիսին բնությունն է քեզ ստեղծել, դու դառնում ես արհեստական»:
Սյունե Առաքելյան