Երեկ՝ սեպտեմբերի 29-ին, Լուարա Հայրապետյանը նշում էր ծննդյան 19-ամյակը: «Մանկական Եվրատեսիլ 2009»-ի հայ մասնակիցը NEWS.am STYLE-ի հետ կիսվեց իր տարեդարձի մանրամասներով, ինչպես նաեւ մեզ տրամադրեց բացառիկ լուսանկարներ իր ծննդյան օրվա խնջույքից:
«Շատ ուրախ օր եմ անցկացրել: Առաջին շնորհավորանքներս ստացել եմ մայրիկիս եւ քույրիկիս կողմից: Ուղիղ ժամը 12-ին ընկերներս եկան մեր տուն եւ մեծ անակնկալ ինձ մատուցեցին»,-ասում է այժմ ԱՄՆ-ում բնակվող երգչուհին, որը երեկ բազում շնորհավորանքներ ու բարեմաղթանքներ է ստացել տարբեր մարդկանց կողմից.
«Բայց անկեղծ ասած՝ այդ ամենի մեջ ինձ համար ամենայուրահատուկ անակնկալը մայրիկիս նվերներից մեկն էր՝ բացիկ, որի մեջ շատ հուզիչ եւ բարի խոսքեր էին գրված»:
Լուարան ծննդյան տարեդարձը նշել է տանը՝ հարազատների եւ ընկերների շրջապատում: Երգչուհու հյուրերի թվում էր նաեւ Էմմին, որին Լուարան քրոջ պես է վերաբերվում:
«Փոքրիկ խնջույք էինք կազմակերպել: Միայն տխրում եմ, որ հայրիկս եւ եղբայրս ինձ հետ չէին, նրանք հիմա Ռուսաստանում են»:
Ինչպես շատերը՝ Լուարան եւս երազանք է պահում ծննդյան տորթի մոմերը փչելիս.
«Երազանք եմ պահում եւ միշտ հավատում եմ, որ այն կիրականանա: Շատ բան չեմ ցանկանում. առողջություն՝ իմ ընտանիքին, հարազատներին եւ մտերիմ մարդկանց: Ինձ համար ամենակարեւոր բանն այս աշխարհում մարդ լինելն է»:
Սյունե Առաքելյան