Ռուսաստանցի օլիգարխի դուստրը ԱՄՆ հարսանեկան ճամփորդությունից հետո չի ցանկանում Ռուսաստան վերադառնալ

Սեպտեմբերի վերջին ռուսաստանցի օլիգարխ, «Ալյանս գրուպի» նախագահ Մուսա Բաժաեւի կրտսեր դուստրը՝ Էլինան, Մոնտե Կառլոյում 20 մլն դոլարանոց հանդերձանքով էր հայտնվել իր հարսանյաց հանդեսին:

22-ամյա Էլինան ամուսնացել էր Բեքհան Մամկաեւի՝ Dorchester Finance եւ Alima Cosmetics ընկերությունների սեփականատիրոջ որդու հետ: Շքեղ հարսանիքը տեղի էր ունեցել Մոնտե Կառլոյի Le Louis XV ռեստորանում, որի ընթացքում նորապսակներին 110 հյուր էր շնորհավորել:

Life-ը հայտնում է, որ 22-ամյա ուսանողուհին ամուսնու հետ հարսանեկան ճամփորդության է մեկնել ԱՄՆ:

Մայամիի ջերմ լողափերը եւ Լաս Վեգասի լույսերը նորաթուխ հարսի վրա այնպիսի տպավորություն են գործել, որ հայրենիք վերադառնալու ցանկացած խոսակցություն նա կտրականապես արգելում է:

Էլինան համացանցում հրապարակել է Նահանգներում իր շրջագայության մանրամասները, իսկ բաժանորդներից մեկի հարցին՝ «Որտե՞ղ է ավելի լավ՝ ԱՄՆ-ո՞ւմ, թե՞ Ռուսաստանում», բավական կտրուկ է պատասխանել. «Ամեն տեղ ավելի լավ է, քան Ռուսիայում»:

Ըստ որում՝ Բաժաեւան խոստովանել է, որ «Մոսկվայի մասին մտքից անգամ վատանում է»: