Այսօր հավանաբար դժվար կլինի բացի Շառլ Ազնավուրից մեկ ուրիշի մասին խոսել։
Հոկտեմբերի 27-ին աշխարհահռչակ հայ շանսոնյեն Քալիֆորնիայի հայ համայնքից «Պատվո աստղ» ստացավ Հոլիվուդի փառքի ծառուղիում։ 92-ամյա հանրահայտ երաժիշտը պարգեւատրման հանդիսավոր արարողությանը հնչեցրած իր խոսքում շնորհակալություն հայտնեց հանդիսատեսին նման պատվի արժանացնելու համար, ինչպես նաեւ կրկին բարձրաձայնեց Հայոց ցեղասպանության մասին.
«Թուրքիան ամեն ինչ կորցրեց: Նրանք ոչ մի մեծ երգիչ չունեն: Ես այսօր թուրքական երգիչ կարող էի լինեի, բայց ֆրանսիացի երգիչ եմ: Սա ապացուցում է փաստը, որ ցեղասպանությունները ոչ մի լավ բանի չեն բերում: Միշտ մնում են վերապրածներ»,- նշել է Ազնավուրը:
Ելույթից հետո երկրպագուները շտապեցին լուսանկարվել կենդանի լեգենդի հետ։ Ցանկացողների թվում էր նաեւ սիրված երգիչ Ձախ Հարութը։
Իսկ ոմանք լուսանկարվելուց բացի նաեւ փոքրիկ նվեր էին պատրաստել արտիստի համար։ Ազնավուրին հայկական նախշերով եւ տարազով հայ գեղեցկուհու պատկերով պայուսակ են նվիրել։
«Սեւան» պայուսակի հեղինակը ամերիկահայ Արփի Գրիգորյանն է, որն անչափ ուրախ եւ հպարտ է, որ իր աշխատանքներից մեկն այժմ Ազնավուրի մոտ է։