Գերմանական Էրֆրուտ քաղաքում տեղի ունեցած խոհարարական մրցույթում հայ հրուշակագործ Վերա Հովհաննիսյանը «արտ կլաս» անվանակարգում նվաճել է առաջին մրցանակը: Վերան պայքարել է տարբեր երկրներից ժամանած 500 խոհարարների հետ: «Ես 100 միավոր ստացա 100 հնարավորից` «Սառցե շրջան» մուլտֆիլմի սկյուռիկի շաքարե արձանիկի համար»,- NEWS.am STYLE-ին ասաց խոհարարը:
Սկյուռիկն իսկապես զարմանահրաշ է. նա կանգնած է երկու թաթի վրա, նկատելի է նրա մորթու յուրաքանաչյուր աղվամազը: Հարկ է նշել նաեւ արձանիկի գեղարվեստական բաղադրիչը. աշխույժ ու զվարճալի սկյուռիկի կերպարը, որը պաշտում է ընկույզ եւ իր շիկակարմիր ընկերուհուն, որին եւս հրուշակագործը կարողացել է մեծ վարպետությամբ պատրաստել:
NEWS.am STYLE-ին Վերան ասաց, որ իր սիրելի թեման մուլտֆիլմի հերոսների շաքարե արձանիկներն են: Նա նաեւ խոստովանում է, որ քաղցրակեր է: Ինչ վերաբերում է ավելորդ կալորիաներին, ապա Վերան պատասխանեց. «Ես փաստերին ավելի շատ եմ հավատում, քան տեսությանը: Ես քաղցրավենիք ուտում եմ եւ չեմ գիրանում: Նշանակում է, եթե քաղցրը գիրացնում է, ապա ես բացառություն եմ»: