«Դա իմ պատճառով չէր»․ Ուիլ Սմիթի կինը՝ «Օսկարի» ժամանակ ամուսնու կողմից Քրիս Ռոքին հասցված ապտակի մասին

Ջադա Փինկետ Սմիթը հայտնել է, որ, Ուիլ Սմիթը «Օսկար» մրցանակաբաշխության ժամանակ իր պատճառով չի ապտակել Քրիս Ռոքին, գրում է Daily Mail-ը։

2022-ի «Օսկարի» մրցանակաբաշխության ժամանակ Ուիլը բարձրացավ բեմ եւ ապտակեց Քրիսին այն բանից հետո, երբ կատակերգուն հումորային ակնարկ արեց Ջադայի սանրվածքի մասին, որը պարզվեց, որ տառապում է ալոպեկիայից:

Հեռուստադիտողները շտապեցին մատնացույց անել Ջադայի վրա՝ պնդելով, որ նա ազդանշան է ուղարկել Ուիլին՝ կկոցելով աչքերը:

Այնուամենայնիվ, խոսելով Սթիվեն Բարթլեթի The Diary Of A CEO փոդքաստում, Ջադան բացատրել է, որ ինքը որեւէ կապ չի ունեցել իրավիճակի հետ:

Ծիծաղելով տեսությունների վրա` նա նշել է. «Նույնիսկ, եթե դա լիներ ազդանշան, ես չեմ կարող ստիպել Ուիլին որեւէ բան անել»։

Նա շարունակել է. «Ես գիտեի, որ ինձ մեղադրելու են, այսինքն՝ դա խելագարություն էր, բայց ես գիտեի, որ փոթորիկ է լինելու»:

Հարցին, թե արդյոք նա ընկալո՞ւմ է Ուիլի գործողությունները որպես «սիրո դրսեւորում», Ջադան, ով բաժանված էր Ուիլից ապտակի պահին, պատասխանել է. «Դա, իսկապես, բարդ պահ էր, իսկապես․․․ Ես կասեի՝ այո եւ ոչ։ Ես, միանշանակ, կարծում եմ, որ դա շատ ավելին էր: Դա իմ մասին չէր, դրա համար էլ բարդ է ինչ-որ բան ասելը։ Դա շատ ավելին էր, քան այդ պահը, շատ ավելին, քան ես։ Նա եւ Քրիսն ունեն իրենց պատմությունը, որը բավական խորը արմատներ ունի»,-ասել է Ջադան, որն օրերս է բացահայտել, որ ինքն ու Ուիլն արդեն 7 տարի է՝ գաղտնի բաժանված են։ 

Լուսանկարը՝ Arturo Holmes/FilmMagic/Getty Images