Տիհանա vibes. Թվում է՝ պարզ հարցեր են, պարզվում է՝ ոչ այնքան

Միխայիլ Շուֆուտինսկին ժամանեց Հայաստան

Տիհանա Vibes. Ընկերները, սեքսը, շաուրման. իսկ ձեզ ի՞նչն է երջանկացնում

Ի՞նչ ակնկալիքներ ունեն երեւանցիները «Եվրատեսիլում» Լադանիվայի մասնակցությունից

«Օսկար 2024». Լավագույնները, «ամենամերկը», հմայիչ Քենն ու մյուս հիշարժան պահերը

Տիհանա Vibes. Իսկ դուք պատրա՞ստ եք ձեր կնոջ համար այսպիսի «քննություն» հանձնել

«Մենչի վերջը» ստենդափի պրեմիերան, հայտնի հյուրերն ու գլխավոր «մեսիջը»

Տիհանա Vibes. մի քանի շոթ ու դեսից–դենից զրույց Վաչե Երիցյանի հետ

POP NEWS. Շաբաթվա իրադարձությունները` մեկ տողով

«Բարի օր»՝ տաքսիստ Հենդոյի հետ. Մհեր Մխիթարյանի հայտնի կերպարի մասին ֆիլմի պրեմիերան ու կարմիր գորգը

Տիհանա Vibes. Ո՞վ է Նեմրայում ամենաcute-ն ու ամենաsexy-ն

Տիհանա Vibes Արսեն Գրիգորյանի հետ. Ընկերուհի չունեմ, ժամանակ չունեմ

Տիհանա Vibes. Իսկ դուք կկարողանայի՞ք պատասխանել այս հարցերին

Pop NEWS. Շաբաթվա ամենաքննարկված իրադարձությունները

Սիրո տոնը՝ Սիրուշոյի հետ. բացառիկ կադրեր՝ երգչուհու համերգից, որի տոմսերն անմիջապես սպառվել էին

Տիհանա Vibes. փեսացուն հյուսիսից եւ Տրնդեզի խարույկի բոցերը

Kinodaran-ի՝ մեծ աղմուկ հանած «Սուրբը» սերիալը նոր իրականություն է սահմանում Հայաստանում

«2024-ին, վերջապես, կամուսնանանք». Գևորգ Մկրտչյան

Exclusive. «Հույս ունեի՝ երազանքս մի օր կկատարվի». Արծվիկը՝ որպես դիզայներ ներկայանալու եւ իր հավաքածուի մասին

13:32, 8 դեկտեմբերի

«Եվրատեսիլ 2017»-ի հայաստանյան ներկայացուցիչ Արծվիկը որոշել է իրականացնել իր տարիների երազանքն ու ներկայանալ որպես դիզաներ: Երգչուհին շուտով կներկայացնի իր հավաքածուն, իսկ թե ինչպիսին կլինի այն, Արծվիկը բացառիկ զրույցի ընթացքում պատմել է NEWS.am STYLE-ին:

Երգչուհի-դիզայները խոսել է նաեւ հոկտեմբերին կայացած իր մենահամերգի մասին, ինչպես նաեւ մեզ է տրամադրել իր նոր ֆոտոշարքը:

Արծվիկ, վաղուց էիր նշում, որ հետաքրքրված ես նորաձեւությամբ եւ որ քո բեմական կերպարների հարցերով էլ ինքդ ես զբաղվում, այնուամենայնիվ, հետաքրքիր է իմանալ՝ երբվանի՞ց հասունացավ հավաքածու ստեղծելու միտքը:

Դեռ փոքր տարիքից, երբ չէի երգում, պատկերացնում էի ինձ բեմում՝ հենց իմ հեղինակած հագուստով ու կերպարներով: Միշտ մտածել եմ, որ ունենալու եմ իմ ստեղծած բրենդը: Իսկ երբ արդեն սկսեցի զբաղվել երգով, հասկացա, որ պետք է իրագործեմ նաեւ մյուս երազանքս: 5-6 տարի առաջ եմ դեռ մտածել հավաքածու ստեղծելու մասին, սակայն միշտ երաժշտական ասպարեզում էր շատ զբաղվածություն լինում՝ The Voice,  համերգներ, «Եվրատեսիլ», եւ չէի հասցնում իրականացնել մտածածս:  

Ճիշտ եք՝ հաճախ էի անդրադառնում այդ թեմային, ասում էի, որ շուտով կլինի հավաքածու, եւ այդ ժամանակն արդեն հասունացավ:  Գիտեք, առհասարակ, երբ պետք է բեմ դուրս գամ, առաջնահերթ մտածում եմ կերպարիս մասին, թե ինչ պետք է հագնեմ: Երբ հարմարավետ եմ հագնված լինում, դա նաեւ դրականորեն է ազդում իմ երգեցողության վրա: Երաժշտությունն ու նորաձեւությունն իմ կյանքի անբաժանելի մասնիկն են: Ի դեպ, ընկերուհիներս եւ կոլեգաներիցս շատերն էլ կարող են դա փաստել, որովհետեւ հաճախ ինձանից են խորհուրդներ հարցնում հագուստի եւ բեմական կերպարների վերաբերյալ: Ես էլ սիրով օգնել եւ օգնում եմ բոլորին: Նրանք ինձ դեռ վաղուց էին ասում, որ պետք է ոճաբան դառնամ:

Գործունեությունդ ծավալում ես ե՛ւ Հայաստանում, ե՛ւ Ռուսաստանում. այս երկու երկրներում էլ ներկայացված կլինի՞ հավաքածուդ:

Աշխատանքները տարվում են ե՛ւ Մոսկվայում, ե՛ւ այստեղ: Այո, այն ներկայացված կլինի ե՛ւ Հայաստանում, ե՛ւ Ռուսաստանում:

Ի՞նչ ոճի հագուստ ես ներկայացնելու:

Երկու տարբերակ էի մտածում ստեղծել՝ կամ երեկոյան շքեղ զգեստներ, կամ casual ոճի հագուստ: Այնուամենայնիվ, նկատած կլինեք, որ ինձ ավելի մոտ է casual ոճը: Սիրում եմ ստեղծել այնպիսի կերպարներ, որոնք անսովոր կլինեն եւ կտարբերվեն: Կյանքում պետք չէ նմանվել: Ինքս էլ սիրում եմ հագնել կոստյումներ, բայց անպայման փորձում եմ այնպիսի համադրություն ընտրել, որ միանգամից զգացվի, որ դա իմ ձեռագիրն է: Հագուստից սկսած մինչեւ աքսեսուարներ՝ ամեն ինչ մանրամասնորեն մտածում եմ: Իմ հարցազրույցներում միշտ նշել եմ, որ հույս ունեմ՝ երազանքս մի օր կիրականանա, եւ ահա, այդպես էլ լինում է:

Ե՞րբ ես մտածում այն ներկայացնել հանրությանը:

Ամեն ինչ գրեթե պատրաստ է, պարզապես ցանկանում եմ, որ այն ներկայացվի ճիշտ ժամանակին: Ճիշտն ասած՝ ցանկանում էի Ամանորի շեմին արդեն որոշ բաներ ներկայացնել համացանցում, բայց տեսնենք, թե ինչպես կստացվի:

Արծվիկ, քո բեմական կերպարները գրեթե միշտ վառ են եւ դրական երանգների մեջ: Արդյո՞ք այդ պայծառությունը կգերակշռի նաեւ քո հավաքածուում:

Այո, իմ հավաքածուում եւս կգերակշռեն վառ գույները, որովհետեւ ես կարծում եմ՝  մեր կյանքն այնքան էլ պայծառ չէ, գորշ գույները, ցավոք, գերակշռում են: Եվ ես ցանկանում եմ, որ այն մարդիկ, ովքեր հագնեն իմ ստեղծած հագուստը, պայծառություն զգան եւ երջանկանան: Եթե մարդկանց տրամադրությունը բարձրանա, ես էլ ինձ երջանիկ կզգամ: Բայց գույներից զատ՝ սիրում եմ նաեւ, երբ կերպարը լինում է էլեգանտ եւ նուրբ:

Վերադառնանք երգարվեստին: Ի՞նչ նորություններ ունես այդ ասպարեզում:

Հիմա աշխատում եմ նաեւ իմ անգլալեզու ալբոմի վրա, այն երեւի լույս կտեսնի հունվարին: Ինչպես տեսաք՝ արդեն նոր երգ եմ ներկայացրել, որը հայերենով է: Այն հեղինակել ենք ես եւ Սոսի Խանիկյանը: Իսկապես, չէի սպասում, որ այն այդքան դուր կգա հեռուստադիտողներին: Շատերը գրում են, որ սպասում են նաեւ տեսահոլովակին, բայց տեսահոլովակին դեռ մի քիչ էլ պետք է սպասեն :) Եվս մեկ երգ ունեմ հայերենով:

Նկատեցի, որ համացանցում մրցույթ ես հայտարարել տվյալ երգի վերնագրի հետ կապված, որը պետք է որոշեին երկրպագուներդ: Արդեն ընտրե՞լ ես համապատասխան վերնագիր:

Դեռ հետեւում եմ երկրպագուներիս ուղարկած տարբերակներին: Շատ հետաքրքիր մեկնաբանություններ կան, բայց մենք դեռ ընտրում ենք: Որոշել ենք մի փոքր էլ սպասել, եւ ավելի շատ մարդկանց ընտրությանը մասնակից դարձնել: Առաջարկում եմ, որ ուշադիր լինեն, որովհետեւ ես անպայման նշելու եմ, թե ով է հաղթել մրցույթում եւ մեծ սիրով նրան կնվիրեմ իմ սինգլը՝ իմ ստորագրությամբ:

Արծվիկ, հոկտեմբերի 28-ին Մոսկվայում կայացավ քո մենահամերգը: Ինչպե՞ս այն անցավ:

Համերգս հրաշալի անցավ: Ճիշտն ասած՝ շատ էի հուզվում, բայց ամեն ինչ այնքան լավ անցավ: Հատուկ շնորհակալություն եմ ուզում հայտնել Ալեքսանդր Գրացկիին, որը եւս մեզ աջակցեց: Շնորհակալ եմ նաեւ գործընկերներիս, որոնք մասնակցեցին համերգին եւ բոլոր երկրպագուներիս՝ այդ ջերմության համար: Նման համերգ կլինի նաեւ Հայաստանում: Ուզում եմ համերգային շրջագայություն ունենալ, հանդես գալ տարբեր շրջաններում եւ քաղաքներում, այդ թվում՝ իմ սիրելի Կապանում, որովհետեւ գիտեմ, որ այնտեղ ինձ շատ են սպասում:

Շուտով կմեկնարկի «Դեպի Եվրատեսիլ» մրցույթը, որի առաջին հաղթողը նախորդ տարի դարձար դու: Որպես հաղթող եւ «Եվրատեսիլ»-ի մասնակից՝ ի՞նչ կմաղթես մրցույթի այս տարվա մասնակիցներին:

Մասնակիցներին մաղթում եմ այն, ինչ բոլորն էին ինձ մաղթում՝ ինքնավստահություն, ինչն ամենակարեւորն է: Պետք է լսես սրտիդ ու անես քո գործը, բայց չմոռանաս նաեւ, որ ներկայացնում ես երկիր, որովհետեւ դա շատ մեծ պատասխանատվություն է:

Արծվիկ, ինչպես նշեցիր քո երազանքներից երկուսը՝ երգչուհի եւ դիզայներ լինելը, արդեն իրականացել են: Էլ ի՞նչ երազանքներ ունես:

Կցանկանայի նաեւ ֆիլմում նկարահանվել, բայց լավ առաջարկի դեպքում: Առաջարկներ եղել են Ռուսաստանում, սակայն ոչ այնքան հետաքրքիր, դրա համար էլ մերժել եմ, որովհետեւ կարծում եմ՝ երբ այդքան մեծ էներգիա ես ծախսում նկարահանումների ժամանակ, պետք է մարմնավորես այնպիսի կերպարի, որը քեզ հոգեհարազատ կլինի:

Սյունե Առաքելյան


Հետևեք NEWS.am STYLE-ին Facebook-ում, Twitter-ում և Instagram-ում





  • Այս թեմայով



@NEWSam_STYLE

  • Արխիվ
Որոնել