• Գողացել են Փարիզի նորաձեւության շաբաթվա առաջիկա ցուցադրության Balmain-ի հագուստները

  Ցուցադրությունն ամեն դեպքում կկայանա նախատեսված օրը՝ սեպտեմբերի 27-ին, Էյֆելյան աշտարակի մոտ․․․

• Հին Հոլիվուդի սեւ-սպիտակ երազանքը՝ Հարիս Ռիդի հավաքածուում

  Այս հավաքածուի նպատակն էր հարգանքի տուրք մատուցել «դյութիչ եւ չափազանցված կանացիությանը»՝ զարգացնելով մի գաղափար, որը միշտ գոյություն է ունեցել Ռիդի հավաքածուներում․․․

• Իրինա Շեյքը պոդիումում հայտնվել է աչքի տակի կապտուկով

  Ցուցադրություն, սադրանքներ, կեղծ կապտուկներ․․․

• Tiffany & Co.-ն ներկայացրել է BLACKPINK-ի Ռոզեից ոգեշնչված իր կապսուլային հավաքածուն

  Tiffany & Co. ոսկերչական տունը ներկայացրել է բոլորովին նոր կապսուլային հավաքածու․․․

• Puppets & Puppets-ը ցուցադրում է Նյու Յորքի կանացիության երկակիությունը

  Ստեղծագործական տնօրեն Կարլի Մարկը ստեղծել է մի հավաքածու, որը որքան հուզիչ է, նույնքան էլ՝ գեղեցիկ...

• Carolina Herrera գարուն/ամառ 2024 հավաքածու՝ խաբուսիկ պարզություն

  Carolina Herrera-ն ներկայացրել է իր գարուն/ամառ 2024 հավաքածուն Ուիթնիի ամերիկյան արվեստի թանգարանի գլխավոր նախասրահում․․․

• Balenciaga-ն կրկին վեճ է հրահրել․ այս անգամ 1000 դոլարից ավելի արժեք ունեցող անձրեւային կոշիկների պատճառով

  Դրանք հիշեցնում են Hunter Wellington-ի դասական կոշիկները, որոնք սովորաբար արժեն 200 դոլարից պակաս․․․

• ASTROLOUBI․ վերջին սենսացիան Christian Louboutin-ից

  Այս ոճային հաճույքն արժե մոտ $1000․․․

Չափսը կարեւոր է՝ հատկապես, երբ խոսքը վերաբերում է մոդելային բիզնեսին։ Երկար տարիներ մենք պոդիումներում տեսնում էինք միայն բարձրահասակ ու նիհար մոդելների։ Վերջին տարիներին տենդենցը սկսել է փոխվել․ ցուցադրություններին հայտնվել են «միջին չափսի» և «պլյուս-չափսի» մոդելներ։

Օրերս Vogue ամսագրի շապիկին հայտնվեցին միանգամից երեք կանանց լուսանկար, որոնք մեծ դեր ունեն մոդելային ոլորտում։ Խոսքը Ջիլ Կորտլեւի, Փրեշ Լիի եւ Պալոմա Էլսեսերի մասին է։ Դժվար է նրանց անվանել plus-size, բայց մոդելային բիզնեսի համար դա այդպես է։

Ջիլ Կորտլեւը (կանաչով) նկարահանվել է Alexander McQueen ապրանքանիշի համար։ Նա հոլանդացի է՝ հնդկական, սուրինամական եւ ինդոնեզական արմատներով։ Ի սկզբանե մոդելը փորձել է տեղավորվել նորաձեւության ինդուստրիայի ստանդարտների մեջ, սակայն, ի վերջո, հրաժարվել է դիետաներից, իսկ հետո հաջողությունը ժպտացել է նրան։

Փրեշ Լին կրում է շագանակագույն զգեստ։ Նա առաջին սեւամորթ մոդելն է, որը գրավել է Versace-ին։ Նա կարծում է, որ իր մոդելային կարիերան կարող է ոգեշնչել ամբողջ աշխարհրի աղջիկներին։

Մուգ կապույտ զգեստովը Պալոմա Էլսեսերն է, որը մոդել դառնալու մտադրություն չի ունեցել․ ուսումնասիրել է հոգեբանություն եւ գրականություն։ Կուլտային դիմահարդար Փեթ Մաքգրաթն է նրան բերել նորաձեւության արդյունաբերություն՝ նկարահանելով իր կոսմետիկ բրենդի գովազդային արշավում։ Դրանից հետո նորաձեւության ինդուստրիան սկսեց հետաքրքրվել աղջկանով, իսկ այժմ նա լուսանկարվում է Vogue-ի համար եւ մասնակցում Ռիհաննայի, գրեթե, բոլոր ցուցադրություններին։

Նման մոդելների՝ նորաձեւության ամսագրերի շապիկներին հայտնվելը լուրջ  հաղորդագրություն է: Պոդիումներում դեռեւս քիչ է չափսերի եւ մարմնի տեսակների բազմազանությունը: Նորաձեւության արդյունաբերությունը դեռեւս «վախենում է», ինչպես իրենք են կարծում, ոչ իդեալական մարմիններից։

Վերջին տարիներին մասնագետները սկսել են նկատել միջին կամ մեծ չափսեր ունեցող մոդելների թվի նվազում։ Կան նորաձեւության տներ, որոնց ցուցադրություններին նման կերպարներ, առհասարակ, չեք տեսնի։ Սա հիասթափեցնող եւ անհանգստացնող է: Տարբեր չափսերի, հասակների եւ համամասնությունների միտումը թույլ տվեց շատ կանանց տեսնել իրենց պոդիումին, գնահատել, թե ինչպես որեւէ հագուստ կնստի իրենց մարմնին: Ցուցադրություններին սովորական չափսեր ունեցող աղջիկների ներկայությունը շատերին թույլ է տալիս ընդունել իրենց արտաքինը։

Եկեք ուսումնասիրենք 2023 թվականի գարուն-ամառ ցուցադրություններն ու այնտեղ պլյուս չափսի մոդելների մասնակցությունը: Միաժամանակ կիմանանք, թե այս սեզոնին նորաձեւության ինչ միտումներ են առաջարկվել նրանց համար։

Փայլ

Փայլուն գործվածքները գրավել են պոդիումները: Խոսքը, ինչպես մետաղական փայլերի, այնպես էլ համեստ փայլիկների մասին է: Նման գործվածքներն արդեն դուրս են եկել ամանորյա միտումների սահմաններից։ Այժմ դրանք օգտագործվում են ամենօրյա կերպարների մեջ։ Ամբողջ հանդերձանքը կամ միայն դրա որոշ դետալներ կարող են փայլել: Կապ չունի, թե ինչ չափս եք կրում, ոչ ոք չի կարող ձեզ հետ պահել ձեր սիրելի զգեստը կամ կոստյումը կրելու հաճույքից:

Կտրվածքների բազմազանություն

Կտրվածքներն առկա են հագուստի ամենաանսպասելի հատվածներում՝ կողքերին, կրծքավանդակին, մեջքին: Պոդիումներում տարբեր բացվածքները հանդիպում են նախանձելի հաճախականությամբ եւ արդեն ներթափանցում են առօրյա նորաձեւության մեջ։ Կիսաշրջազգեստների բարձր ճեղքերը, որոնք համարձակորեն բացում են ոտքերը, նույնպես գրավել են պոդիումը: Ամենահամեստների համար կարող եք գտնել փոքր կտրվածքներով զգեստներ, որոնք շատ չեն ցուցադրում մարմինը: Իսկ համարձակ մոդայիկները կարող են դիտարկել այնպիսի զգեստներ, որոնք կողային հատվածում կամ կրծքին բաց կտրվածքներ ունեն: Իսկ ո՞վ ասաց, որ կտրվածքներ կարող են կրել միայն նիհար աղջիկները։ Ձեր կերպարը ոչ թե ձեւի, այլ համարձակության եւ ոճի հարց է։

Կտրվածքները լավ համադրվում են մեկ այլ միտումի` ասիմետրիկության հետ: Դրանք կարելի է միքսել նաեւ թափանցիկ գործվածքների, հետաքրքիր դետալների, օրինակ՝ ձեռնոցների հետ, որոնք կիրառվում են առօրյա եւ երեկոյան կերպարների մեջ։

Քրոփ-տոպեր

Մի վախեցեք կտրվածքներով վերնաշապիկներից, նույնիսկ եթե ձեր չափսը XS-ից մեծ է: Այս դետալը կարելի է համադրել բլեյզերով, խոշոր զարդերով կամ կրել առանց որեւէ այլ դետալի: Ուշադրություն դարձրեք օվերսայզ պայուսակներին, որոնք նույնպես սեզոնի թրենդ են դարձել, զանգվածային տակացուներով կոշիկներին եւ մաքսի երկարության կիսաշրջազգեստներին։ 

Երկարության հարցեր

Կիսաշրջազգեստների երկարությունը պոդիումներում թելադրում է միմյանց հակասող բաներ։ Արդյունքում երկու նորաձեւության միտումները՝ մաքսի եւ մինի կիսաշրջազգեստները, հանգիստ գոյակցում են կողք կողքի։ Այսպիսով, այս սեզոնին ուրախ կլինեն ե՛ւ ծնկները ցուցադրել սիրողները, ե՛ւ երկար զգեստների կողմնակիցները։ Կիսաշրջազգեստի երկարությունը թելադրվում է միայն ձեր կազմվածքով ու ցանկություններով։

Թափանցիկություն

Դիզայներների համարձակ որոշում, որին ոչ բոլորը հակված կլինեն։ Բայց ոչ ոք չի ասում, որ նորաձեւ դառնալու համար պարտադիր է կրել կիսաթափանցիկ տոտալ լուք։ Բավական է ավելացնել թափանցիկ դետալներ, որոնք ընդգծում են ուրվագիծը։

Սեւ

Սեւ գույնի մասին կարելի է անվերջ խոսել, բայց մենք պարզապես նշում ենք, որ սա սեզոնի թրենդային երանգներից մեկն է։ Ամռանը հագեք սեւ, ոճավորեք ձեր տեսքը դետալներով եւ դարձեք անդիմադրելի։

Կաշի եւ էկո-կաշի

Կաշվից պատրաստված ապրանքները կամ պոդիումներում դրա օգտագործման օրինակները շատ են՝ կաշվե բաճկոններ, բայկերային բաճկոններ, էլեգանտ երեկոյան զգեստներ, անձրեւանոցներ, կիսաշրջազգեստներ․․․ Հագեք մինի կամ մաքսի, համարձակ բացվածքներ կամ փակ ուրվագիծ: Կարեւորը, որ սիրեք հագուստը:

Երեկոյան նորաձեւություն

Ոչ ստանդարտ չափսերի մոդելները ցուցադրում են ոչ միայն առօրյա հանդերձանքներ։ Երեկոյան կերպարներն անհրաժեշտ են ցանկացած կնոջը։ Այս լուսանկարներում տեսնում ենք, թե ինչպես են նորաձեւության միտումները ներթափանցել երեկոյան զգեստապահարան։ Այստեղ կան եւ փայլուն գործվածքներ, եւ կորսետներ, եւ սեւ կերպարներ: Մնում է միայն տեղ գնալու առիթ ստեղծել։

Իր կյանքի ընթացքում յուրաքանչյուր մարդ կարող է զգալ քաշի եւ արտաքինի փոփոխություններ: Ցավոք, նույնիսկ plus-size մոդելների լուսանկարները միշտ չէ, որ կրում են body positive վերաբերմունք կամ ինքնաընդունում: Ֆոտոշոփի առատությունն անում է իր գործը, իսկ այն իդեալը, որ ցուցադրում են մոդելները, ստեղծում է անհասանելիության տպավորություն։ Ուստի, կարեւոր է ուշադրություն դարձնել ոչ միայն ամսագրերի շապիկներին եւ լուսանկարներին, այլեւ շարժման մեջ գտնվող մոդելներին, գուցե՝ նրանց հետեւել սոցիալական ցանցերում, որպեսզի հասկանանք, որ մեր մարմինները գեղեցիկ են եւ ռետուշի կարիք չունեն:

Հետևեք NEWS.am STYLE-ին Facebook-ում, Twitter-ում և Instagram-ում