Քաղցկեղը հաղթահարած հայ մոդելը դարձել է Չինաստանում կայացած գեղեցկության մրցույթի հաղթող
11:13 30 դեկտեմբերի, 2023Չինաստանի Շենժեն քաղաքում կայացած World Madam Competition 2023-ի հաղթող է ճանաչվել հայ մոդել Հասմիկ Սանամյանը, որը հայտնի է նաեւ Ջեսի անունով: Գեղեցկության մրցույթի շրջանակում տարբեր երկրների կանայք ցուցադրում են իրենց մշակույթը: Այս տարի Ջեսին, ներկայացնելով Հայաստանը, արժանացել է «Աշխարհի ամենամյա չեմպիոնի» կոչմանը, հայտնում է ChinArmArt-ը։
Քաղցկեղը հաղթահարած եւ վիտիլիգո ունեցող մոդելն իր ելույթում ընդգծել է յուրաքանչյուր կնոջ գեղեցկությունն ու յուրահատկությունը ցուցադրելու կարեւորությունը։ Նա հայտարարել է, որ ոչ քաղցկեղը, ոչ վիտիլիգոն, ոչ մի բան չպետք է խեղաթյուրեն կնոջ իրական գեղեցկությունը։
Ջեսիի մասնակցությունը նպատակ ուներ խրախուսելու կանանց՝ ընդունել իրենց անհատականությունը: Նա կարծում է, որ յուրաքանչյուր կին ունի յուրահատուկ ներաշխարհ եւ գեղեցկություն, որը պետք է գնահատվի՝ անկախ այն դժվարություններից, որոնց կարող է հանդիպել։