Կախարդանք՝ մեկ շշի մեջ․ Maison Perrier-Jouët շամպայնը՝ 100,000 դոլարով
21:23 30 հունվարի, 2024Շամպայն, արվեստ եւ բնություն՝ անգերազանցելի համադրություն: Ավելի քան երկու դար Maison Perrier-Jouët-ը տիրապետում է մի արվեստի, որի մասին շատերը կարող են միայն երազել:
Perrier-Jouët-ը միավորվել է հեղինակավոր Atelier Montex-ի հետ՝ ստեղծելու Libellule-ը՝ Perrier-Jouët Belle Époque 2008 թվականի շամպայնը:
Պետք չէ լինել գիտակ, որպեսզի հիանաք Jeroboam Belle Époque 2008-ի շշի դիզայնով: Այն պատված է մետաղագործության եւ ասեղնագործության առեղծվածային ցանցով, որն ավելի ուշադիր զննելով կբացահայտեք ճպուռի զույգ թեւեր:
Բարդ աշխատանքը մարտահրավեր էր նույնիսկ այնպիսի փորձառու հանճարի համար, ինչպիսին Atelier Montex-ն է: Գեղարվեստական ղեկավար Ասուկա Յամաշիտան դիմել է գործընկեր Montex Studio MTX-ի՝ ճարտարապետական ասեղնագործության մասնագետի փորձին՝ կատարելագործելու նուրբ, բայց բարդ կառուցվածքը: Գործընթացը ներառում էր մի քանի քայլ, այդ թվում՝ 3D տպագրություն, նիկելային էլեկտրապատում, 24 կարատանոց ոսկի եւ, վերջապես, մանրակրկիտ ներկում:
Maison Belle Epoque-ի վիտրաժներից ոգեշնչված թանկարժեք երանգները վերածվել են բարդ դիզայնի, որոնցում ներկայացված են մոդերն ոճը խորհրդանշող միջատներ եւ ծաղիկներ: Ոչ պակաս, քան մեկ տարվա հետազոտությունն ու մշակումը, ինչպես նաեւ Atelier Montex-ի արհեստավորներից մեկի անխոնջ աշխատանքը, ով 75 ժամ է նվիրել այս գործին, հանգեցրեց 2008 թվականի հոյակապ Perrier-Jouët Belle Époque-ի ստեղծմանը:
Ներսում վինտաժ է, 50% Շարդոնեի դրախտային խառնուրդ, 45% Պինո Նուար եւ 5% Պինո Մենյե: Perrier-Jouët Belle Époque 2008-ն առանձնանում է նարնջի ծաղկի եւ սպիտակ դեղձի բույրերով: Maison Perrier-Jouët-ը շիշը ներկայացրել է օրերս՝ Փարիզի Նորաձեւության շաբաթվա ընթացքում: Այն արժե 100,000 դոլար, եւ հասանելի է ընդամենը 10 օրինակով: