«Слова пацана» սերիալի հայտնի հիթի կատարողները ելույթ կունենան Երեւանում
14:05 23 փետրվարի, 2024«Теперь запомни- ты теперь пацан. Ты теперь с улицей а кругом враги»… Ռուսական հայտնի «Слова пацана» սերիալի այս տողերն արդեն գիտեն, նույնիսկ, այն մարդիկ, ովքեր չեն դիտել վերջին շրջանի ամենամեծ աղմուկ բարձրացրած սերիալը:
Օրերի ընթացքում սերիալը դարձավ ամենամասսայականը թե Ռուսաստանում, թե նախկին խորհրդային երկրներում, իսկ դրա դերակատարները, որոնց մեծամասնությունը նախկինում հայտնի չէր լսարանին, մեկ գիշերում դարձան աստղեր: Սերիալին զուգահեռ պակաս չքննարկվեցին դրանում հնչած երգերը, ավելին՝ սովետական շրջանի հիթերն այսօր դարձան ինստագրամյան եւ տիկտոկյան թրենդներ:
Մեծ ուշադրության արժանացավ սերիալի գլխավոր սաունդթրեքը, որը հնչում է թաթարերեն «AIGEL» էլեկտրոնային հիփ-հոփ դուետի կատարմամբ: Ուշագրավն այն է, որ այս երգը չի գրվել հենց «Слова пацана» սերիալի համար, պարզապես սերիալի ստեղծագործական թիմը հենց այն համարեց ամենահամապատասխանը:
Օրերս հայտնի դարձավ, որ «AIGEL» էլեկտրոնային հիփ-հոփ դուետը շուտով՝ մարտի 9-ին, կլինի Երեւանում: Նրանց երեւանյան համերգի կազմակերպիչը Unity Production ընկերությունն է: NEWS.am STYLE-ի հետ զրույցում ընկերության համահիմնադիր, պրոդյուսեր Ալեքսանդր Մհերյանը նշեց, որ այս դուետին հենց այս շրջանում էր պետք հրավիրել, երբ սերիալը եւ երգը մեծ աղմուկ են բարձրացրել, այդ թվում՝ Հայաստանում:
«Առհասարակ, ամեն տարի հրավիրում ենք ոչ հայ արտիստների, ովքեր մեծ մասսայականություն ունեն հենց դրսում: Որպես կանոն, դա տեղի է ունենում «Coca-Cola Music Fest»-ի շրջանակում, սակայն այս անգամ հասկացանք, որ պետք է անակնկալներն ավելի վաղ սկսել, մանավանդ, որ սերիալի եւ երգի բումային շրջանը հենց հիմա է»:
Պրոդյուսերի խոսքով՝ «AIGEL» ունի շատ երկրապագուներ, քանի որ էլեկտրոնային հիփ-հոփ սիրողների շրջանում բավական տարածում ուներ նաեւ նախքան «Слова пацана» սերիալը, պարզապես այն մեծացրեց խմբի սիրահարների աշխարհագրությունը:
«Խումբը նախքան Երեւանում ելույթ ունենալը, մարտի 7-ին ելույթ կունենա նաեւ Թբիլիսիում: Ի դեպ, թե այս, թե Երեւանում կայանալիք ելույթի մասին «AIGEL» դուետը խոսել է իր պաշտոնական էջում: Մենք էլ խոստանում ենք տարբերվող եւ հուշեր առաջացնող երեկո. փորձում ենք միշտ թրենդային դեմքերին հրավիրել Հայաստան, որպեսզի գլխավոր հիթերը հայ երաժշտասերները կենդանի վայելելու հնարավորություն ունենան»,-եզրափակեց Ալեքսանդր Մհերյանը:
Նշենք, որ մարտի 9-ին «AIGEL»-ից բացի Երեւանում ելույթ կունենան նաև DJ Donz-ը եւ DJ Smoke-ը, որոնց նոստալգիկ ռիթմերը հանդիսատեսին կտանեն նոստալգիկ 90-ականներ։