Yerevan Fashion Week 2024-ի շրջանակում նախատեսվում է «Փարաջանովը եւ նորաձեւությունը» խորագրով ցուցահանդես
16:33 23 փետրվարի, 2024Նորաձեւության եւ դիզայնի պալատը՝ Սերգեյ Փարաջանովի թանգարանի հետ համատեղ, մայիսին Yerevan Fashion Week 2024-ի շրջանակներում նախաձեռնում է «Փարաջանովը եւ նորաձեւությունը» խորագրով ցուցահանդես, որտեղ Փարաջանովի ստեղծագործությունների կողքին կներկայացվեն հայ դիզայներների աշխատանքները՝ ոգեշնչված մաեստրոյի արվեստով, ասվում է ընկերության ինստագրամյան էջի հաղորդագրության մեջ։
Նախաձեռնության նպատակն է դիզայներներին հնարավորություն ընձեռել ուսումասիրելու արվեստագետի թողած հարուստ ժառանգությունը, ներկայացնել թանգարանը եւ հայկական մշակույթը նորաձեւության եւ դիզայնի միջոցով:
Посмотреть эту публикацию в Instagram
Մասնակցության համար դիզայներները պետք է ներկայացնեն նախնական մուդբորդ եւ 2-3 էսքիզներ կամ պատրաստի պրոդուկտի լուսանկար՝ ցուցահանդեսին ներկայացվելիք հագուստի, գլխազարդի կամ զարդերի:
Այն դիզայներները, ում էսքիզները կընտրվեն մասնակցության համար, կստանան հնարավորություն վերջնական կերպարը ստեղծելու եւ ներկայացնելու:
Դիմումներն ընդունվում են մինչեւ մարտի 10-ը:
Երեւանի Նորաձեւության Շաբաթը ֆինանսավորվում է GIZ-ի կողմից իրականացվող Մասնավոր հատվածի զարգացում եւ ՄԿՈՒ Հարավային Կովկասում ծրագրի կողմից։