«Բարի օր»՝ տաքսիստ Հենդոյի հետ. Մհեր Մխիթարյանի հայտնի կերպարի մասին ֆիլմի պրեմիերան ու կարմիր գորգը (ֆոտո/վիդեո)
15:38 1 մարտի, 2024Մհեր Մխիթարյանի սքեթչերից հայտնի տաքսիստը՝ նոր կատակերգության հերոս: Երեկ՝ փետրվարի 29-ին, «Մոսկվա» կինոթատրոնում կայացավ Գրիգոր Գասպարյանի եւ Արման Սարգսյանի «Բարի օր» ֆիլմի պրեմիերան:
Ֆիլմի գլխավոր հերոս՝ հասարակ երեւանյան տաքսիստ Հենդոյի կյանքը կտրուկ փոխվում է, երբ ինչ-որ հրաշքով նրա ամեն օրը սկսում է կրկնվել բոլոր մանրուքներով։ Հենդոն պետք է կարողանա դուրս գալ այս անլուծելի եւ անելանելի իրավիճակից։ Բայց ինչպե՞ս։ Չէ՞ որ ամեն առավոտ արթնանալով՝ նա նույն օրն է ապրում։ Հենդոն հասկանում է, որ պետք է փոխվել։ Նա սկսում է կատարելագործվելու, բարիանալու, կրթվելու իր ճանապարհը՝ օրեցօր ուղղելով նախկին սխալները եւ դառնալով ավելի լավը: Այս դժվարին ճանապարհին նրան սպասում են անհավանական ու զվարճալի արկածներ, ֆանտաստիկ իրավիճակներ ու պատմություններ։
Ֆիլմում նկարահանվել են Մհեր Մխիթարյանը, Էվա Խաչատրյանը, Ռոզի Ավետիսովան, Նանուլը, Վարդան Քոչարյանը, Գարիկ Մարտիրոսյանը, Իվետա Մուկուչյանը, Արմեն Պետրոսյանը, Արկադի Դումիկյանը եւ այլ հայտնիներ:
Ռեժիսոր Գրիգոր Գասպարյանի խոսքով՝ սցենարի շուրջ աշխատել են 6 ամիս. այն ոգեշնչված է Groundhog Day հայտնի ֆիլմից, բայց ներկայացված է հայկական կոլորիտին համահունչ:
«Մհերի կողմից ստեղծված տաքսիստ Հենդոն, որը շատ հայկական կերպար է արդեն 2-3 տարի է կար: Կերպարը, որն իր փոքրիկ սքեթչերում տարբեր մարդկանց մասին էր պատմում, սիրվել էր, եւ մարդիկ մտածում էին՝ ով է Սուսոն, ովքեր են նրա մայրը, կինը, երեխան… Այդպիսով միտք առաջացավ գեղարվեստական ֆիլմ նկարահանել Հենդոյի մասին, որտեղ բոլորին կտեսնենք: Վաղուց կար նաեւ զուգահեռ միտք օգտագործել այդ «ժամանակային թակարդը», եւ դա շատ լավ համընկավ կերպարի հետ, որովհետեւ Հենդոն պետք է փոխվեր, բայց նրան դրա համար պայման էր պետք, եւ հենց այս իրավիճակը դրան շատ համահունչ էր»:
Արման Սարգսյանը, որը եւս հանդիսանում է ֆիլմի ռեժիսորը, ասում է՝ ֆիլմում կարեւորել են ուսուցողական հատվածը, ինչպես եղավ Հենդոյի դեպքում. նա սովորեց շտկել սեփական սխալները:
«Կերպարը շատ բաների միջով է անցնում, փորձել ենք այնպես անել, որ ինքը վերջնական արդյունքում իրեն գտնի ու հասկանա՝ այս կյանքում ինչն է պետք գնահատել ու կարծում եմ՝ ստացվել է»:
Ֆիլմի գլխավոր դերակատարների հարցազրույցներն ու կարմիր գորգի հատուկ հյուրերը՝NEWS.am STYLE-ի ռեպորտաժում:
Սյունե Առաքելյան