Անահիտ Հակոբյանն ու Մովսես Մովսիսյանը կպայքարեն Հայաստանը «Նոր Ալիք 2024»-ին ներկայացնելու համար: Այս մասին պարզ դարձավ երեկ՝ Seven Visions, The Dvin Resort-ում կայացած «Նոր Ալիք»-ի նախընտրական փուլի ժամանակ, որին մասնակցում էր 30 երգիչ:
Մասնակիցները ելույթ ունեցան ժյուրիի առաջ, որը գլխավորում էր «Նոր Ալիք»-ի բեմադրող ռեժիսոր Ալեքսանդր Ռեւզինը: Ժյուրիի կազմում էին նաեւ մրցույթի տարբեր տարիների հայ մասնակիցները՝ Էրիկը, Սոնա Ռուբենյանը, Սոնա Շահգելդյանը, Սարոն, կոմպոզիտոր Սյուզաննա Թովմասյանը եւ հաղորդավար Ավետ Բարսեղյանը:
Մասնակիցները իրենց ելույթների համար նախապատրաստել էին երկու երգ՝ մեկն իրենց երգացանկից, մյուսը՝ հայկական հիթ: Նախընտրական փուլը հաղթահարած երկու մասնակիցները Հայաստանը ներկայացնելու ուղեգրի համար կպայքարեն արդեն Մոսկվայում:
Անահիտ Հակոբյանը հեռուստադիտողին հայտնի է «Աստղիկներ», «X Factor» եւ «Հայաստանի Ձայնը» նախագծերից: Մովսես Մովսիսյանը՝ «Հայ երգիչ» նախագծից:
«Նոր Ալիք 2024»-ում Հայաստանի մասնակցությունն իրականացնում է «Թովմասյան» հիմնադրամը՝ «Արմենիա» հեռուստաընկերության հետ համատեղ:
Մրցույթն այս տարի անցկացվելու է օգոստոսի 22-ից 27-ը:
Սյունե Առաքելյան