«Ո՞րն է արվեստի լավագույն գործը, որը երբեւէ ստեղծել եք»: «Ո՞րն է ձեր կենդանակերպի նշանը»․․․ Սալվադոր Դալիի թանգարանի այցելուները հայտնի իսպանացի սյուրռեալիստին ամենատարբեր հարցերն են տալիս, իսկ նա «պատասխանում է» արհեստական ինտելեկտի միջոցով, որը ստեղծված է էսսեների եւ արխիվային հարցազրույցների տվյալների հիման վրա, որոնք արտացոլում են նրա գաղափարները, երեւակայությունն ու հումորը, գրում է Forbes-ը:
Այցելուները Դալիի հետ «շփվում են» նրա ամենահայտնի սյուրռեալիստական կոմպոզիցիաներից մեկի՝ «օմարի տեսքով հեռախոսի» միջոցով։ Այն զվարճալի կերպով համատեղում է կապի միջոցը եւ պլաստիկե խեցգետնակերպին՝ ստեղծելով տարօրինակ նոր իրականություն, ինչպես դա հաճախ էր անում Դալին: Կրկնօրինակը գտնվում է Ֆլորիդայի թանգարանում՝ իրական ստեղծագործությունից ընդամենը մի քանի ոտնաչափ հեռավորության վրա, որը 1930-ականներին ստեղծված նմանօրինակ 10 հեռախոսներից մեկն է:
«Հարցրեք Դալիին» սարքը չի հասնում իրական ստեղծագործության չափսերին: Այստեղ շեշտը դրված է Դալիի ձայնի վրա, որը գալիս է օմարի տեսքով հեռախոսի միջոցով: Մատչելիության համար նրա պատասխանները հայտնվում են մոնիտորի վրա՝ որպես ենթագրեր։