Airbnb-ը թույլ կտա ժամանակ անցկացնել թռչող տնակում կամ հանգստանալ Փրինսի Purple Rain առանձնատանը
16:21 2 մայիսի, 2024Airbnb-ը հայտարարել է նոր՝ «Icons» կատեգորիայի մասին՝ «արտասովոր փորձառությունների հավաքածու, որը մշակվել է երաժշտության, կինոյի, հեռուստատեսության, արվեստի, սպորտի եւ այլ ոլորտների խոշորագույն անունների կողմից»:
«Icons-ը ձեզ կտեղափոխի աշխարհներ, որոնք նախկինում գոյություն են ունեցել միայն ձեր երեւակայության մեջ»,-ասել է Airbnb-ի համահիմնադիր եւ գործադիր տնօրեն Բրայան Չեսկին,-«Քանի որ կյանքը դառնում է ավելի թվային, մենք ձգտում ենք ավելի շատ կախարդանք բերել իրական աշխարհ: Icons-ի միջոցով մենք ստեղծել ենք Երկրի վրա ամենաարտասովոր փորձառությունները»:
Ահա՝ Icons-ի՝ մինչ այժմ հայտարարված ժամանցավայրերից մի քանիսը.
Սավառնեք ամպերի մեջ գտնվող տնակում
«Գիշերեք Disney-ի եւ Pixar-ի ամենահայտնի տներից մեկում, եւ, այո, այն թռչում է: Դուք կուսումնասիրեք Կարլի աշխարհը հենց նրա տնից, որը հագեցած է ավելի քան 8000 փուչիկներով, եւ տեղակայված է Նյու Մեքսիկոյի Աբիկյուի գեղատեսիլ կարմիր ժայռերի մեջ»:
Դարձեք VIP անձնավորություն՝ Քեւին Հարթի հետ
«Քեւին Հարթը հրավիրում է ձեզ իր Coramino Live Lounge սրահ՝ բարձրակարգ երեկոյի: Այս գաղտնի վայրում դուք կմիանաք Քեւինին եւ նրա ընկերներին․ այստեղ կլինեն տեկիլայի համտեսներ եւ կանցկացվեն լավագույն հումորիստների ստենդափ շոուները:
Միացեք Doja Cat-ին
«Doja Cat-ը հրավիրում է ձեզ շատ ավելի ինտիմ փորձառության: Դուք անմոռանալի կատարումներ կվայելեք «Գրեմմիի» դափնեկրի հյուրասենյակում, ներառյալ նրա սիրելի երգերն ու վերջին ալբոմի թրեքերը»:
Հյուրընկալվեք Փրինսի Purple Rain տանը
«Փրինսը գնել էր Մինեապոլիսում գտնվող տունը, որը ցուցադրվել է «Մանուշակագույն անձրեւ» լեգենդար ֆիլմում, բայց մինչ այժմ այն հասանելի չի եղել հանրությանը: Բացահայտեք տունը եւ վայելեք Փրինսի աշխարհից հազվագյուտ եւ հատուկ երգերը՝ բացառիկ ստուդիական սեսիայում»:
Հայտնվեք «X մարդիկ 97»-ի աշխարհում
«Ապրե՛ք X մարդկանց պես՝ հանգրվանելով Marvel Animation Studios-ի 2D անիմացիոն հանգստավայրում, որը գտնվում է Նյու Յորքի Վեսթչեսթեր շրջանում: Դուք կբացահայտեք ձեր մուտանտային ունակությունները եւ, նույնիսկ, կմարզվեք «Վտանգավոր սենյակում»»:
Icons-ը ներառում է նաեւ գիշերակաց՝ Փարիզի Օրսե թանգարանում, կամ այցելություն Բոլիվուդի աստղ Ջանհվի Կապուրի տուն:
Փորձառությունները ներկայացված են Airbnb հարթակի առանձին կատեգորիայում : Բոլորը մեկ անձի համար արժեն մոտ 100 դոլար, սակայն յուրաքանչյուր փորձի համար, վիճակահանության սկզբունքով, կընտրվեն միայն սահմանափակ թվով հարցումներ: