Դանիլա Կոզլովսկու մոնոներկայացումը՝ Երեւանում. դերասանի մանկության հուշերը՝ Սինատրայի երգերի ներքո

Երեւանում՝ Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնում, երեկոն հագեցած էր յուրահատուկ մթնոլորտով՝ շնորհիվ Դանիլա Կոզլովսկու հրաշալի մոնոներկայացման։ Հանդիսատեսը սուզվեց նրա մանկության եւ պատանեկության աշխարհ՝ դերասանի կատարմամբ Ֆրենկ Սինատրայի դյութիչ ջազային մեղեդիների ուղեկցությամբ։

Կոզլովսկին սկսեց մանկության հուզիչ հիշողություններով, իր առաջին սիրով, առաջին խմիչքով եւ իր արտիստական կարիերայի առաջին քայլերով: Ծիծաղը, կարեկցանքն ու ուրախության բացականչությունները թեւածում էին դահլիճում։

Այս ամենը միահյուսված էր հոյակապ երաժշտական ​​համարներով․ Դանիլա Կոզլովսկին կատարում էր Ֆրենկ Սինատրայի ջազային հիթերը, որոնցից են «I love you baby»-ն եւ «My Way»-ը: Նրա կատարումն այնքան հոգեհարազատ էր, որ թվում էր, թե Սինատրան ինքն էր կանգնած բեմում։

Երաժշտությունից բացի, Կոզլովսկին պոեզիա էր կարդում. հանդիսատեսը վերհիշեց Պուշկինին, որի գործերը սովորել էր դպրոցում։ Դերասանը նաեւ ստեղծագործություն նվիրեց իր դստերը:

Հանդիսատեսը հիացմունքով էր լսում նրա հաջողության ճանապարհի մասին պատմությունները, իսկ վերջում արտիստի հետ միասին կատարեցին եզրափակիչ երգը եւ Կոզլովսկուն ճանապարհեցին բուռն ծափահարությունների ներքո։