Սմոքինգը, որը Մարլոն Բրանդոն կրել է «Կնքահայրը» ֆիլմում, հանվել է աճուրդի

Սմոքինգը, որը Մարլոն Բրանդոն կրել է 1972 թ-ի «Կնքահայրը» ֆիլմում, հանվել է աճուրդի։ Այն նախկինում երբեք աճուրդի չի հանվել, եւ ակնկալվում է, որ Studio Auctions աճուրդում կվաճառվի ավելի քան 200 000 դոլարով, տեղեկացրել է Robb Report-ը։

«Մենք հիացած ենք այն բացառիկ հավաքածուով, որը հավաքել ենք գալիք աճուրդի համար»,- հայտնել է Studio Auctions-ի համահիմնադիր Բրեդ Տեպլիցկին։ «Այնպիսի ֆիլմեր, ինչպիսին «Կնքահայրն» է, ունեն գրավչություն, որը ժամանակից դուրս է, եւ մենք ուրախ ենք մեր հաճախորդներին առաջարկել կինեմատոգրաֆիական պատմության մասնիկի տերը դառնալու հնարավորություն»։

Աճուրդները կկայանան սեպտեմբերի 20-22-ը եւ հոկտեմբերի 25-27-ը։ Վիտո Կոռլեոնեի սմոքինգը, որը Բրանդոն կրում է օսկարակիր ֆիլմի առաջին հարսանեկան տեսարաններում, ակնհայտորեն գլխավոր լոտերից մեկն է։ Դերասանի երկրպագուները հնարավորություն կունենան ձեռք բերել Բրանդոյի նոթատետրը, որը պարունակում է ամենահայտնի հոլիվուդյան աստղերի անուններն ու հեռախոսահամարները (մեկնարկային գինը՝ ավելի քան 40 000 դոլար)։