Կանանց մոտ, ովքեր հազվադեպ են սեքսով զբաղվում, 70%-ով մահվան ռիսկն ավելի բարձր է
23:05 26 հուլիսի, 2024Այն կանայք, ովքեր հազվադեպ են սեքսով զբաղվում, 70%-ով ավելի շատ են կանգնած մահվան վտանգի առաջ, քան նրանք, ովքեր սեքսով են զբաղվում շաբաթական առնվազն մեկ անգամ: Բացի այդ, դեպրեսիա ունեցող մարդիկ, ովքեր սեքսով են զբաղվում շաբաթական մեկ անգամից պակաս, ունեն 197%-ով ավելի բարձր մահվան ռիսկ, քան նրանք, ովքեր սեքսով են զբաղվում շաբաթական մոտ մեկ անգամ: Այս արդյունքները հրապարակվել են Journal of Psychosexual Health ամսագրում:
Հետազոտությունների համաձայն՝ հաճախակի սեքսը կարող է օգնել նվազեցնել սթրեսը եւ բարելավել տրամադրությունը՝ արտազատելով էնդորֆիններ եւ օքսիտոցին: Այն կարող է նաեւ ամրապնդել իմունային համակարգը՝ օրգանիզմը դարձնելով ավելի դիմացկուն վարակների եւ հիվանդությունների նկատմամբ:
Կանոնավոր սեքսուալ ակտիվությունը նպաստում է սրտանոթային առողջությանը՝ ավելացնելով սրտի հաճախությունը եւ արյան շրջանառությունը: Այն բարելավում է քնի որակը՝ արտազատելով պրոլակտին հորմոնը, որը կապված է թուլացման հետ։ Հաճախակի սեքսը կարող է նաեւ բարելավել մտերմությունը եւ ամրապնդել հարաբերությունները՝ նպաստելով ընդհանուր հուզական բարեկեցությանը:
Սրիկանտա Բաներջիի եւ գործընկերների կողմից իրականացված հետազոտությունը նպատակ ուներ ուսումնասիրել սեռական հարաբերությունների հաճախականության եւ մահացության միջեւ կապը: Նրանք վերլուծել են NHANES-ի տվյալները՝ Առողջապահության վիճակագրության ազգային կենտրոնի ծրագիրը, որը նախատեսված է Միացյալ Նահանգներում մեծահասակների առողջությունը գնահատելու համար՝ օգտագործելով հարցազրույցների եւ ֆիզիկական հետազոտությունների համախմբված տվյալները:
Հետազոտության ընտրանքը ներառում էր 20-ից 59 տարեկան 14542 չափահաս ամերիկացի: Ընդհանուր առմամբ, 20-59 տարեկան մասնակիցների 95%-ը սեքսով է զբաղվել տարին ավելի քան 12 անգամ, իսկ 38%-ը՝ շաբաթական մեկից ավելի:
Հազվադեպ սեքսով զբաղվող կանանց մոտ 70%-ով ավելի բարձր է մահվան ռիսկը, համեմատած այն կանանց հետ, ովքեր ավելի հաճախ են սեռական հարաբերություն ունեցել: Հետազոտողները առանձին-առանձին ուսումնասիրել են սեքսի հաճախականության եւ մահացության կապը այն մարդկանց մոտ, ովքեր սեքսով են զբաղվում շաբաթական մեկից պակաս անգամ, եւ նրանց մոտ, ովքեր սեքսով են զբաղվում շաբաթական մեկից ավելի անգամներ:
Երբ նույն վերլուծությունն անցկացվել է շաբաթական մեկից ավելի սեքսով զբաղվող մարդկանց շրջանում, սեքսի հաճախականության եւ մահվան ռիսկի միջեւ կապ չի նկատվել: Սա հաստատում է այն գաղափարը, որ առնվազն շաբաթը մեկ անգամ սեքսով զբաղվելը կարող է կարեւոր լինել սեքսի հետ կապված առողջապահական օգուտներին հասնելու համար:
«Էթնիկապես բազմազան բնակչության դեպքում մենք պարզեցինք, որ սեքսի ցածր հաճախականությունը կարող է հանգեցնել ընդհանուր մահացության եռակի աճի, նույնիսկ առողջական եւ ժողովրդագրական գործոնները վերահսկելուց հետո: Մեր բացահայտումները ցույց են տալիս, որ սեռական ակտիվությունը կարեւոր է ընդհանուր սրտանոթային առողջության համար: Հանրային առողջապահական միջամտությունները պետք է նախագծվեն՝ հաշվի առնելով սեռական առողջությունը»,- եզրակացրել են հետազոտության հեղինակները: