Տղամարդկանց կոսմետոլոգիա. կոսմետոլոգ Արմինե Աղաջանյանը՝ տղամարդկանց խնամքի նրբությունների մասին

Եթե նախկինում մաշկի խնամքն ընկալվում էր որպես բացառապես կանացի ոլորտ, ապա այսօր արդեն տղամարդիկ հաճախ են դիմում պրոֆեսիոնալ կոսմետոլոգի՝ մաշկի խնամքը դարձնելով առօրյայի մի մասը։ Մաշկի պատշաճ խնամքը տղամարդկանց օգնում է երիտասարդ մնալ և խուսափել այնպիսի խնդիրներից, ինչպիսիք են սափրվելիս դեմքի գրգռվածությունը, չորությունը և վաղ կնճիռները: Կոսմետոլոգ Արմինե Աղաջանյանը խորհուրդ է տալիս, թե տղամարդիկ ինչպես խնամեն դեմքի մաշկը, որպեսզի երկար տարիներ առողջ և խնամված մաշկ ունենան։

Տղամարդկանց մաշկն ունի իր առանձնահատկությունները. ավելի խիտ է, յուղոտ և հաճախ սափրվելու ժամանակ ենթարկվում է մեխանիկական սթրեսի, ինչը կարող է առաջացնել գրգռվածություն և բորբոքում: Տարիքի հետ նույնիսկ հաստ մաշկը կարող է կորցնել առաձգականությունը, չորանալ և ենթարկվել վաղ ծերացման: «Տղամարդիկ որքան շուտ սկսեն խնամել մաշկը,- բացատրում է Արմինեն,- այնքան երկար այն թարմ և առողջ տեսք կունենա: Մաշկի խնամքը միայն դիմահարդարումը չէ, ինչպես հաճախ կարծում են, այն առողջության կարևոր բաղադրիչ է»։

Մաշկի հիմնական խնամքն այն նվազագույնն է, որը մաշկը պահում է լավ վիճակում և կանխում ծերացման վաղ նշաններն ու բշտիկների և սև կետերի առաջացումը:

Մաքրում

Մաքրումը խնամքի հիմքն է, որը հեռացնում է կեղտը, ճարպը և կոսմետիկ մնացորդները: «Առավոտյան և երեկոյան դեմքը լվանալու համար օգտագործեք փափուկ փրփուր կամ կաթ, որպեսզի ձեր մաշկը մաքուր լինի»,- խորհուրդ է տալիս Արմինեն։ «Այս միջոցները հարմար են ամենօրյա օգտագործման համար՝ առանց մաշկը չորացնելու»։

Պիլինգ և շերտազատում

Պիլինգը կարևոր քայլ է, որը շատ տղամարդիկ բաց են թողնում: «Շաբաթը 1-2 անգամ սկրաբը կամ ֆերմենտային պիլինգը կօգնի հեռացնել մաշկի մահացած բջիջները և կանխել ծակոտիների խցանումը»,- ասում է Արմինեն։ Սափրվելուց հետո մաշկը հաճախ լրացուցիչ խնամքի կարիք ունի, իսկ շերտազատումն օգնում է մազերի ներաճը կանխելուն ու ծակոտիները մաքուր պահելուն:

Խոնավացում

Տղամարդկանց մաշկը խոնավացման կարիք ունի ոչ պակաս, քան կանանցը։ Ամենօրյա խոնավացնող միջոցի օգտագործումը կանխում է չորությունը, մաշկը պաշտպանում շրջակա միջավայրի վնասներից և պահպանում նրա բնական պատնեշը: Ընտրեք թեթև նյութակազմվածքով քսուքներ, որոնք արագ ներծծվում են և կպչունություն չեն թողնում։

Պրոֆեսիոնալ բուժում տղամարդկանց համար

Կոսմետոլոգները տղամարդկանց խորհուրդ են տալիս երիտասարդ և առողջ մաշկը պահպանելու համար կանոնավորապես հաճախել մասնագիտական պրոցեդուրաների։

Ահա մի քանի ընթացակարգ, որ հարմար են ցանկացած տարիքի տղամարդուն.

Դեմքի ուլտրաձայնային մաքրում. օգնում է ծակոտիների խոր մաքրմանը և մաշկի մեռած բջիջների հեռացմանը, ինչը բարելավում է մաշկի տեսքն ու տոնուսը: Ուլտրաձայնը նրբորեն և արդյունավետորեն հեռացնում է կեղտերը՝ չվնասելով մաշկը: Հարմար է նույնիսկ զգայուն մաշկի համար:

Դեմքի մերսում. խթանում է արյան շրջանառությունը, բարելավում մաշկի երանգը և կանխում վաղ կնճիռները: Ավելի լավ արդյունքի համար կարող եք օգտագործել խոնավացնող յուղ կամ շիճուկ, որը լրացուցիչ կսնուցի մաշկը։

Ավելորդ մազերի հեռացում մոմով կամ շաքարով. ազատում է անցանկալի մազերից և մաշկը հարթ դարձնում։

Մազահեռացումն օգնում է նաև մաշկի թեթևակի շերտազատմանը՝ ավելի թարմ տեսք հաղորդելով:

Պիլինգ և խոզանակ. թարմացնում են մաշկը, վերացնում պիգմենտացիան ու պզուկների հետքերը և բարելավում մաշկի ընդհանուր վիճակը: Հատկապես օգտակար են նրանց համար, ովքեր խամրած մաշկի և հոգնածության զգացողություն ունեն:

Սնուցող և խոնավացնող դիմակներ. նպաստում են մաշկի վերականգնմանը՝ սնուցելով վիտամիններով և օգտակար բաղադրիչներով։ Պաշտպանում են սթրեսից և շրջակա միջավայրի վնասակար ազդեցություններից՝ մաշկին թարմություն և փայլ հաղորդելով:

Ժամանակակից տղամարդիկ մաշկի խնամքի պրոցեդուրաներն ավելի ու ավելի հաճախ են ընդգրկում առօրյայում, և դա սեփական անձի հանդեպ հոգատարության և առողջության նկատմամբ ուշադիր վերաբերմունքի ցուցանիշ է։ Մաշկի խնամքը վերաբերում է ոչ միայն արտաքին տեսքին, այլև առողջությանը, քանի որ խնամված մաշկն ուշ է ծերանում և ավելի քիչ խնդիրներ է հարուցում։ Եթե ցանկանում եք միշտ երիտասարդ ու գրավիչ տեսք ունենալ, անհապաղ կապվեք կոսմետոլոգի հետ և դեմքի հիմնական խնամքը դարձրեք ձեր առօրյայի մի մասը։