Ժորա Շահինյանի մեծ համերգը ԱՄՆ-ում ու հանդիսատեսի արձագանքը․ բացառիկ կադրեր
15:32 6 դեկտեմբերի, 2024Շքեղ, աննախադեպ ու մասշտաբային․ այսպես կարելի է նկարագրել Ժորա Շահինյանի և Էռնեստ Հովհաննիսյանի՝ ընդամենը օրեր առաջ ԱՄՆ-ում կայացած համերգը: Համերգն, իսկապես, սպասված էր հանդիսատեսի կողմից, որի մասին փաստում է տոմսերի՝ համերգից մոտ մեկ ամիս առաջ արդեն ամբողջովին սպառված լինելը: Հայ արտիստներից շատերն են նշել, որ այնտեղ հանդիսատեսը բոլորովին ուրիշ էներգիա և զգացողություններ է փոխանցում բեմին կանգնած երգչին։ Համերգը ևս մեկ անգամ եկավ ապացուցելու այս փաստը։
Ամբողջ թիմը համերգին նախապատրաստվել էր ամենայն լրջությամբ՝ հատուկ ուշադրություն դարձնելով երգացանկին։ Համերգի ընթացքում Ժորան կատարեց իր ամենահայտնի ու հիթային երգերը՝ հայրենասիրականից մինչև սիրային։ Գրեթե բոլոր կատարումների ընթացքում հանդիսատեսը ձայնակցում էր երգչին։
Ողջ համերգի ընթացքում Ժորան պարբերաբար շփվում էր հանդիսատեսի հետ՝ ստեղծելով առավել ջերմ և անմիջական մթնոլորտ։ Արդյունքում դահլիճը երգում ու պարում էր առանց կաշկանդվելու՝ իսկապես պահը վայելելով։
Արտիստները մի քանի ժամ անընդմեջ ելույթ ունեցան կենդանի կատարումներով։ Ժորան ինքն իր համար այս համերգով նոր նշաձող սահմանեց ու անգամ գերազանցեց այն։
Ժորա Շահինյանի YouTube-յան ալիքի դիտումներն արդեն վաղուց անցել են միլիոնների սահմանը։ Համերգը ապացուցեց՝ դրանք պարզապես թվեր չեն, այլ հանրության սերն ու գնահատականն է արտիստի նկատմամբ։
Արդեն համերգից հետո դահլիճից դուրս եկող յուրաքանչյուր հանդիսատես նշում էր՝ երեկոն ստացված էր ու սպասված։ Ժորա Շահինյանն իր հերթին խոստացավ՝ նման մասշտաբային համերգները շարունակական են լինելու։
Հեղինակ՝ Լիլիթ Աբգարյան