Տղամարդիկ կանանցից գրեթե երկու անգամ ավելի արագ են սիրահարվում

Տղամարդիկ կանանցից գրեթե երկու անգամ ավելի արագ են սիրահարվում։ Ավստրալիայի ազգային համալսարանի գիտնականները հարցում են անցկացրել 33 տարբեր երկրների 808 երիտասարդների շրջանում՝ ռոմանտիկ հարաբերություններում գենդերային տարբերությունները բացահայտելու համար:

Արդյունքները ցույց են տվել, որ միջին վիճակագրական տղամարդուց չորս շաբաթից մի փոքր ավելի է պահանջվում սիրահարվելու համար, մինչդեռ կանայք շատ ավելի դանդաղ են առաջ շարժվում այս ուղղությամբ:

«Կանանց մոտ սիրո զարգացման միջին ժամանակը եղել է ռոմանտիկ հարաբերությունների ձեւավորումից 1,92 ամիս հետո, իսկ տղամարդկանց մոտ՝ 0,98 ամիս, ինչը ցույց է տալիս, որ տղամարդիկ սիրահարվում են կանանցից մոտ մեկ ամիս շուտ»,- նշվել է Biology of Sex Differences ամսագրում հետազոտողների հրապարակած հոդվածում:

Հետազոտության համար բոլոր հարցման ենթարկվածները եղել են 18-25 տարեկան:

Հաշվի առնելով, որ սովորական մասնակիցն արդեն մի քանի անգամ սիրահարվել է, չնայած նրանց համեմատաբար երիտասարդ տարիքին, ուսումնասիրությունը ցույց է տվել, որ ռոմանտիկ սերը բավական տարածված է: Երիտասարդներից շատերը, հավանաբար, կյանքի ընթացքում մի քանի անգամ էլ դեռ կսիրահարվեն։

Մինչդեռ, հետազոտությունը ցույց է տվել, որ թեեւ տղամարդիկ ավելի հաճախ եւ ավելի արագ են սիրահարվում, ավելի հավանական է, որ կանայք ավելի ուժեղ զգացմունքներ են ունենում, երբ ի վերջո հարաբերությունների մեջ են մտնում: «Կանայք ավելի բարձր ռոմանտիկ սիրո ինտենսիվություն են ունեցել, ավելի բարձր նվիրվածություն եւ ավելի սեւեռուն մտքեր սիրելիի մասին, քան տղամարդիկ»,- հայտնել են գիտնականները: