Հայկական երաժշտություն, համաշխարհային աստղեր եւ «Ղափաման»՝ բաժակում. Yerevan Cocktail Week 2025-ին սպասվող նորությունները
19:13 14 ապրիլի, 2025Մայիսի առաջին շաբաթը Երևանում խոստանում է լինել թեժ, և ոչ միայն կանխատեսումների համաձայն։ Մայիսի 5-ից 11-ը մայրաքաղաքը կրկին կվերածվի տարածաշրջանի բարի էպիկենտրոնի. մեկնարկում է Yerevan Cocktail Week 2025-ը։ Մեծ անուններ, հայկական հոգով ֆիրմային կոկտեյլներ, կրթական սեմինարներ և մշակութային ծրագիր համաշխարհային փառատոնների մակարդակով. այս ամենն արդեն դարձել է փառատոնի խորհրդանիշը, և այս տարի նշաձողը միայն բարձրացվում է։
Ինչպես նշել է Yerevan Cocktail Week-ի կազմակերպիչ Գեղամ Ղազարյանը, որը բար արդյունաբերության լեգենդար գործիչ է, հայկական կոկտեյլների փառատոնը միայն խմիչքների մասին չէ. «Սա միակ մշակութային կոկտեյլ-փառատոնն է աշխարհում: ժողովրդական, դասականից մինչև ժամանակակից մեկնաբանություններ – այս ամենը մենք վերածում ենք կոկտեյլային լեզվի»։
Յուրաքանչյուր փառատոնի ժամանակ մասնակից բարերը, իսկ այս տարի դրանք 18-ն են, պատրաստում են հատուկ կոկտեյլներ՝ ոգեշնչված տարվա թեմայով: Իսկ 2025 թվականին մեզ սպասում են իսկական բացահայտումներ։ Օրինակ, «Ղափաման» կոկտեյլ է, որը վերստեղծում է հայկական սիրելի ուտեստի համը, իսկ «Սուսերով պարը» իր անվանը վայել համարձակ, վառ խառնուրդ է:
Զուգահեռաբար կանցկացվեն ավելի քան 18 կրթական սեմինարներ՝ փորձագետների մասնակցությամբ ամբողջ աշխարհից՝ Իտալիայից, Ֆրանսիայից, ԱՄՆ-ից, Ճապոնիայից, Մեքսիկայից և ԱՄԷ-ից։ Բարմենները, միքսոլոգները, կոկտեյլների պատմաբանները և միջազգային ոլորտի աստղերը կխոսեն միտումների, բաղադրիչների, տեխնիկայի և փիլիսոփայության մասին: Սեմինարները տեղի կունենան ոչ միայն բարերում, այլև անսպասելի վայրերում՝ օպերայից մինչև թանգարաններ: Իսկ մայիսի 8-ին մասնակիցները կմեկնեն Գառնի, որտեղ, ավանդույթի համաձայն, կխառնվի կոլեկտիվ Negroni-ն՝ տարբեր երկրների հյուրերի բաղադրիչներն ու էներգիան համակցող կոկտեյլը։ «Անցյալ տարի մեր Negroni-ն հասավ Ճապոնիա, Ամերիկա, Իսպանիա, սա էներգետիկ կոկտեյլ է, մենք դրա տակ խորհում ենք, օրհնում, և այն արտահանվում է աշխարհ»,- նշում է Գեղամը։
Հյուրերի թվում կան իրական լեգենդներ՝ Մաուրո Մահջուբը (Negroni-ի արքա), Խուլիո Բերմեխոն (Tommy’s Margarita-ի ստեղծողը), Ջորջ Հարիսը՝ ԱՄՆ-ից հայկական արմատներով աստղ, ով առաջին անգամ է ժամանելու իր նախնիների հայրենիք, և տասնյակ այլ բարձրակարգ մասնագետներ։ Բացի համտեսներից, հյուր բարմենների հետ երեկոներից և ֆիրմային շնորհանդեսներից, կլինի նաև ավանդական կոկտեյլ ծես՝ Գառնիում համընդհանուր նեգրոնիի խառնուրդ, որտեղ յուրաքանչյուր հյուր կբերի խմիչքի իր տարբերակը:
Գործընկերների շրջանում ներառված են տեղական և միջազգային բրենդներ, այդ թվում՝ հայկական ջիներ Oski և Vogis, իսպանական Match Tonic, ռուսական «Белая берёзка» և Գեղամի անհատական նախագծերը: Այս ամենի հետ մեկտեղ նաեւ համաշխարհային լրատվամիջոցներ։ Երեւան կգան El País-ի, Forbes Italia-ի լրագրողներ, Գերմանիայից ու Ֆրանսիայից առաջատար հրատարակությունների ներկայացուցիչներ:
Նախագիծը չէր կարող իրականացվել առանց մասնագիտական աջակցության։ Բարմենների հայկական ասոցիացիայի նախագահ Տիգրան Ավետիսյանը վստահեցնում է, որ նման միջոցառումները հզոր խթան են հաղորդում ոլորտին։ «Գաստրոնոմիական զբոսաշրջությունը դառնում է Հայաստանի այցեքարտը։ Իսկ հայկական բարերի մակարդակը լավագույններից է տարածաշրջանում։ Մենք մասնակցում ենք մրցույթների ամբողջ աշխարհում և գրավում առաջին տեղերը։ Մենք պատրաստել ենք ավելի քան 1500 բարմեն, և այս մասնագիտությունը արագորեն զարգանում է»,- պատմեց Տիգրանը։
