Իրանցի ռեժիսոր Ջաֆար Փանահին Կաննի կինոփառատոնում արժանացել է «Ոսկե արմավենու ճյուղի»՝ իր «Դա պարզապես դժբախտ պատահար էր» թրիլլերի համար

Կաննի 2025 թ․ կինոփառատոնի գլխավոր մրցանակը՝ «Ոսկե արմավենու ճյուղը», շնորհվեց իրանցի հայտնի ընդդիմադիր ռեժիսոր Ջաֆար Փանահիին՝ իր նոր ֆիլմի՝ «Դա պարզապես դժբախտ պատահար էր» («It Was Just an Accident») համար։ Այս հաղթանակը պատմական է ռեժիսորի համար, որին վերջին 15 տարում արգելված է լքել Իրանը։

Մրցանակը Փանահիին է հանձնել ավստրալացի դերասանուհի Քեյթ Բլանշեթը։ Երեք տարի առաջ ռեժիսորը բանտարկվել էր Իրանում և հացադուլ հայտարարել։ Չնայած տևական սահմանափակումներին և աշխատանքային արգելքին՝ Փանահին շարունակում էր գաղտնի ֆիլմեր նկարահանել․ «Սա ֆիլմ չէ»-ն ստեղծվել է հենց իր հյուրասենյակում, իսկ «Տաքսի»-ն՝ մեքենայի ներսում։

Հաղթողին հայտարարելուց հետո դահլիճը Փանահիին դիմավորեց երկարատև ծափահարություններով։ Կատարվածից ապշած՝ ռեժիսորը բարձրացրել  ձեռքերն ու ոտքի կանգնել՝ շնորհակալություն հայտնելով գործընկերներին ու հանդիսատեսին։ Բեմում նրան ջերմորեն ողջունել է ժյուրիի նախագահ Ժյուլիետ Բինոշը, որը դեռևս 2010-ին Կաննում բարձրացրել էր ռեժիսորի անունով ցուցանակը՝ ի նշան աջակցության, երբ նա տնային կալանքի տակ էր։

«Դա պարզապես դժբախտ պատահար էր» ֆիլմի հաղթանակը շարունակեց ամերիկյան անկախ դիստրիբյուտոր Neon-ի աննախադեպ հաջողությունների շարքը։ Ընկերությունը ձեռք է բերել ֆիլմի հյուսիսամերիկյան տարածքի ցուցադրության իրավունքը։ Neon-ն արդեն վեց անգամ անընդմեջ ապահովել է «Ոսկե արմավենու ճյուղի» հաղթող ֆիլմերի ցուցադրությունը՝ ներառյալ «Մակաբույծը», «Տիտանը», «Տխրության եռանկյունին», «Անկման անատոմիան» և «Անորա»-ն։

2025 թվականի Կաննի կինոփառատոնի հաղթողները

• Գրան պրի — Յոակիմ Թրիեր՝ «Սենտիմենտալ արժեք»
• Ժյուրիի մրցանակ
  • Մաշա Շիլինսկի՝ «Անկման ձայնը»
  • Օլիվեր Լաքս՝ «Սիրաթ»
• Լավագույն ռեժիսոր — Կլեբեր Մենդոնսա Ֆիլյո՝ «Գաղտնի գործակալը»
• Լավագույն սցենար — Ժան-Պիեր և Լյուկ Դարդեններ՝ «Երիտասարդ մայրերը»
• Լավագույն դերասանուհի — Նադիա Մելլիթի՝ «Փոքր քույրը»
• Լավագույն դերասան — Վագներ Մոուրա՝ «Գաղտնի գործակալը» (ներկա չի եղել մրցանակաբաշխությանը)
• Ժյուրիի հատուկ մրցանակ — Բի Գան՝ «Հարություն»
• «Ոսկե խցիկ» լավագույն դեբյուտի համար — Հասան Հադի՝ «Նախագահի տորթը»
• Արմավենու ճյուղ՝ լավագույն կարճամետրաժ ֆիլմի համար — Թաուֆիկ Բարհոմ՝ «Ուրախ եմ, որ դու հիմա մեռած ես»